– Vijmak julevsáme dålkkum Sámedikken

– Dát beras luluj juo láŋŋga sajen, javllá Guvsám.

Dán ideda gå sámedikkeájrrasa tjåhkanin ållestjåhkanibmáj Kárášjogån de diededij Sámedikke tjåhkanimjådediddje Jarle Jonassen dálla l sihke nuortta- julev- ja oarjjelsámegiela dålkkumdievnastus sajen Sámedikken.

– Miján la sihke nuorttasáme, julevsáme ja oarjjelsáme dålkkå dán ållestjåhkanimen, så sidjij gudi sihti ietjasa sámegielajt adnet de la dat dálla máhttelis, javlaj Jonassen.

Åhtsålij julevsáme dålkkumdievnastusáv

Vásse tjavtja gulájma sámedikkeájras Kirsti Guvsám gut åhtsålij julevsáme dålkkumdievnastusáv Sámedikken.

Dalutjij ij lim sierra julevsáme dålkkå Sámedikken, valla sij gudi dålkkuji nuorttasámegiellaj aj dålkkujin jus julevsámegiellaj håladuváj.

– Mån sávav sierra julevsáme dålkåv. Sámedigge ham vuorddá háldadimsuohkana gudi li sámegiela háldadimguovlon galggi dievnastit sábmáj ietjasa addnijt, valla Sámedigge iesj ij la sæmmi tjiehppe dav fállat julevsámegiellaj ja oarjjelsámegiellaj, javlaj Guvsám dijmmá tjavtja.

– Dát la buorre

Ja dán bále de lij julevsáme dålkkå sajen Sámedikken gå ållestjåhkanibme álgij.

– Dát la buorre. Mij lip dáv viehke mælggadav vuorddám ja mån ávvusav gå de vijmak la julevsáme dålkkå dánna, javllá Guvsám.

Guvsám gut iesj ij la julevsámegiela vuostasjgielak vuojnná aj máhttelisvuohtan gullat julevsámegielav Sámedikke tjåhkanimen oassen suv giellaoahppamis.

– Jus dal dålkkuduvvá julevsámegiellaj de máhtáv ham mån sámegielav oahppat navti. Ja munji aj sjaddá dálla máhttelis iehtja sámástit ja dat la buorre. Dat dal munji sjaddá hásstalussan gå iesj iv máhte julevsámegielav nav buoragit, valla dálla l gåjt munji máhttelis dav dahkat. Ja diehttelis de hæhttutjav de dálla sábmáj hållagoahtet, javllá Guvsám.

Sån árvvet dát dás-duohku sjaddá stuoves fálaldahkan.

– Dát beras luluj juo láŋŋga sjaen ja diehttelis árvvedav dát sjaddá doajmmat juohkka bále gå midja tjåhkanip Sámedikken, dættot sån.

GULLDAL ÅLLES ÁSSJEV SÁMEGIELLAJ DÁNNA: