Lijga åhttse ja sæmmi bále juogadijga rudájt

– Ij la sáhka gåk iesj sárno ietjat belulasjvuodav, valla gåktu iehtjáda dav dádjadi, javllá vuolepdirektørra Nordlánda fylkamánnen, Tor Sande.

Divtasvuona suohkanoajvve Tor Asgeir Johansen, Barggijbelludagás lij åhttse gå Divtasvuona Åvddånammadus galgaj juollodit rudájt merraæládusfåndas.

Dav sæmmi lij aj Åvddånammadusá sebrulasj gut åvdet Aktisasjlistav Divtasvuona suohkanin, Filip Mikkelsen.

Goappátja lijga rudájt åhtsåm vidnudagáj åvdås gånnå såj libá njunnjusattja.

Johansen ja Mikkelsen sárnojga ietjasa belulattjan gå sunnu åhtsåmusá mierreduvvin, valla lijga fáron mierredime dåjt ietjá åhtsåmusájt ma gilpustin dáj ruhtajuollodimij.

• Lågå aj: Stiller spørsmål ved pengebevilgnin

Ietjanis berustime

Jagen 2011 ásadij Divtasvuona suohkan fåndav mij rudájt oadtju daj guokta luossabiebbmamvidnudagájs ma li Divtasvuonan.

Fånda sisboahto l akta millijåvnnå kråvnnå jahkáj goabbák viddnudagájs ja vihpá gålmmå jage.

Suohkanoajvve Tor Asgeir Johansen.

Foto: Sander Andersen/NRK

Suohkana åvddånammadus fåndav háldat.

Suohkanoajvve Tor Asgeir Johansen åtsåj dijmmá rudájt dát fåndas ietjas vidnudahkaj Kjøpsvik Eiendom AS máksemterminálav divudalátjit. Kjøpsvik Eiendom AS 40 00 kråvnå oattjoj dan ulmmáj.

Dán tjåhkanimen Divtasvuona suohkanoajvve ietjas belulattjan sárnoj dåssju gå ietjas åhtsåmus giehtadaláduváj. Ietján lij maŋen rudájt juohkemin jali hilggomin nuppe åhttsijda.

Tysfjord Turistsenter AS åhtsåj aj rudájt dát fåndas vidnudagáv juonga láhkáj ådåstuhtátjit.

Filip Mikkelsen lij dalloj Tysfjord Turistsenter AS:a stivrrajådediddje. Tysfjord Turistsenterij juogeduváj dan tjåhkanimen 50 000 kråvnå.

Mikkelsen sárnoj ietjas belulattjan dåssju gå åhtsåmus suv vidnudagás giehtadaláduváj. Ietján lij maŋen rudájt juohkemin jali hilggomin nuppe åhttsijda.

Imájdallá barggamvuogev

Nordlánda fylkamánnen imájdalli dáv barggamvuogev.

– Dádjadav dal sunnun gudi ietja lijga åhtsåm rudájt fåndas ejga la fáron mierredime gå jur sunnu åhtsåmusá giehtadaláduvvin. Dat la dal riekta. Valla gatjálvis badján jus galgajga dåjt nuppijt åhtsåmusájt aj giehtadallat? Sierraláhkáj usjudaláv jus li ráddjidum rudá massta åhtsi nav vaj dat vájkkut majt ietja oadtjoba, javllá vuolepdirektørra Tor Sande, Nordlánda fylkamánnen.

– Åvddånammadus mierredij

Divtasvuona suohkanoajvve Tor Asgeir Johansen sivádahttá Åvddånammadusáv ja Divtasvuona rádeålmmåv.

– Mij ságastijma dan birra Åvddånammadusán ja aj rádádijma rádeålmmåjn, ja de mierredijma måj ejma la belulattja giehtadallat gåjt ietjá åhtsåmusájt. Dav ålles Åvddånammadus gávnadij, tjielggi Johansen.

Valla sån vuojnná dálla dát lulu unugis barggamvuohke.

– Ittjij de dalloj biello skuola. Valla gå dån dálla gatjáda de máhttá dal dálla vuojnnet dáv unugis barggamvuohken.

– Dádjada gus jus ulmutja dáv imájdalli?

– Ja gå dal gæhttjap nav gåktu dådnå gatjáda de dav dádjadav. Dáv vierttip mij tjielgadit. Galggá máj liehket luohtádus gåktu mij foanndarudájt juohkep. Så dáv vierttip vas giehtadallat Åvddånammadusán, javllá Johansen.

Filip Mikkelsen ij sidá ássjáj majdik moalgedit javllá sån SMS:a baktu NRK:aj.

GULLDAL ÅLLES ÁSSJEV DÁNNA: