Oadtju bieggamillojt tsieggit

NVE mij la Vuonarijka tjáhtje-ja energijadåjmadahka vuojnná stuoráp ávkev gå nievrep bielijt tsieggitjit bieggamillopárkav Divtasvuona rádjávárijda, ja dan diehti loabev vattij tsieggitjit bieggamillojt dán guovlluj.

NVE dættot guovlluj gåsi bieggamillo galggi tsieggiduvvat juo la dulvvaduvvamguovllo, ja bieggamillotsieggim vájkkut binnep láhkáj luonnduj gå dav jus guovlon åvdutjis ællim makkirik ásadusá tsieggiduvvam.

Oasse Slabávuona bieggamillopárkas gullu Divtasvuona - Vuodnabadá álmmukmiehttse guoradallamguovlluj ja oajvvaduvvam Vuona biele Laponia væráltárbbeguovlluj. Dát luonndosuoddjimprosæssa ganugahteduváj jagen 2001 ja guovllo ij la desti juridihkalattjat tjanáduvvam makkirik láhkáj tjállá NVE.

Slabávuonavárre Bieggapárkka la stuorra bieggaprosjækta mij máhttá buvtadit 250 GWh jahkáj, mij merkaj ásadus máhttá buvtadit strávvev 12.500 gådijda.

Tsieggimbarggo jahkedahtte álggá jagen 2014.

Navti máhtti bieggamillo vuojnnut vuoset gåvvåaktijbiedjam NVE:as.

Foto: NVE

Statskog ittjij konsesjåvnåv oattjo

Statskog AS lij aj åhtsåm loabev tsieggit sulálasj bieggamillojt Vuovddejávrráj vehi dåbbelin sæmmi bájken, valla NVE ittjij Statskog:aj loabev vatte.

Sivva l gå udnásj strávvelinja Slabávuona ja Gásluovta gaskan máhtti strávvev suvddet dåssju avtav bieggamilloásadusás ja ij guokta.

Duodden aj boahtá Statskog:a ásadus ilá næjgga ájdeduvvam sjattojda ma danna lahkusin sjaddi.

• Lågå aj:Kan tape vindmølle-penger
• Lågå aj:70 vindmøller i populært friluftsområde

Suohkan mielos bieggapárkkaj

Divtasvuona suohkanstivrra avtajienalattjat miededij åhtsåmusájt sihke Nordkraft Vind AS:as ja Statskoga SF:as.

– Mijá mielas hiehpá guovllo buvtadittjat ådåstuhtedum energijav. Guovlon la læhkám tjáhtjefábmoásadus juo tjuohte jage ja infrastruktuvrra guovlon la juo sajenis dagu strávvelinja ja rahte, javllá Divtasvuona suohkanoajvve Tor Asgeir Johansen avijssaj Fremover.

Sån la de viehka dudálasj gå NVE loabev vattij dán buvtadibmáj ja doajvvu dát vaddá suohkanij sulle gietjav milliåvnå jahkásattjat sisboahton, ja niellja-gietjav stuoves barggosaje.

Guohtomguovllo ja rádjebálges

Guovllo gåsi bieggapárkka ásaduvvá la aj guohtomguovllo ællosujttuj ja gullu Svieriga tjærojda Baste ja Unna-Tjerutjij. Guovllo l gidá- ja giesseguohtomguovllo ja la ájnas ællosujttuj.

Rádjebálges mij la várrevádtsembálggá majt Divtasvuona suohkan ja Váhtjera suohkan, Svierigin aktisattjat li ásadam Rijtjemis Svierigin Slabávuodnaj Divtasvuodnaj la aj dan sæmmi guovlon.

NVE la dan diehti nágin ævtojt biedjam konsesjåvnnåj.

Duola dagu galggá tsieggijiddje hiebadahttet tsieggimbargov ællosujttuj ja gehtjadit vaj tsieggimbarggo ja bieggamilloj dåjmadibme ij sjatta hieredussan ællosujttuj. Sij galggi aj aktisattjat tjæroj barggat.

Duodden aj gájbbeduvvá tsieggijiddje oajvvat dåjmajt mij sihke gåtset ja åvddånahttá Rádjebálggáv gaskan Vuona ja Svieriga.

Ålles loabev NVE:as lågå dánna.