Sámedikke vuorrasijráde julevsáme guovlon

– Mij la ham ráde mij galggá doajmmat ålles Vuonarijkan ja dan diehti mannap duonna-dánna. Dán bále lip jåvsådam Divtasvuodnaj. Nuppe bále galggap Snoasáj ja goalmát bále mån dåbdåv sjaddá oarjján juonná, gånnå de, subtsas Sámedikke vuorrasijráde jådediddje Inga Karlsen.

Ja jur dan diehti de aj Sámedikke vuorrasijráde manáj institusjåvnåj milta oahpástuvátjit vuoras sámij dilláj gudi huksoinstitusjåvnåjn årru.

• LÅGÅ AJ: – Vájmulasj æjvvalibme Gånågisájn
• LÅGÅ AJ: Inviterte Kong Harald til Tysfjord
• LÅGÅ AJ: Sametingets eldreråd besøker Kongen

Sámegiella ja sáme biebbmo guovdátjin

Sij lidjin gæhttjamin sihke Ájluovta sjaljon Ájluovtan ja Gásluovta vuorrasij sijdan Gásluovtan ma li da guokta stuorámus hukso- sujttoinstitusjåvnå vuorrasij gáktuj Divtasvuonan.

Ájluovta sjaljon sjattaj sáhka sihke sámegiela birra ja biebmoj birra, maktas sáme oadtju dajt biebmojt ja bårråmusájt masi li hárjjánam ja maktas bargge gudi vuorasulmutjijt galggi sujttit, maktas sij sámástit máhtti.

– Vuorasulmutja gudi dánna årru aj sæmmi buoragit dárusti gå sámásti ja dan diehti ælla miján stuorámus hásstalusá giela hárráj. Duodden li moattes mijá barggijs aj sáme ja máhtti sámegielav. Valla gå vuorrasa oadtju demensav ja mujtoduvvi de vajálduhttegåhti dárogielav. Ja dalloj de la dárbbo sámegielak barggijda sijáj gáktuj, subtsas Divtasvuona suohkana sujtto ja huksodievnastusá allebiele guovlojådediddje, Morten Aspaas.

Dasi oattjoj sån muhtem moalkedimijt Vuorrasijráde ájrrasijs.

– Mij vuojnnep dajt sæmmi hásstalusájt dagu Skánegin muv suohkanin. Mån diedáv lidjin sáme vuorrasij sijdajn gudi ållu sjávvunin ja ettjin åvvå bágov moalkeda åvdås gå nágin sámástahttjáj sidjij. De esski ællájin. Navti lij Skánegin, ja iv diede valla jáhkáv dáppe aj lulu muodugasj dille, nammat vas ietjá Sámedikke vuorrasijráde ájras, Magne Einejord.

– Bargge dal diehttelis vierttiji sámegielav máhttet, dættot vas Sámedikke Vuorrasijráde ájras, Anders P. Siri.

Sámedikke vuorrasijráde guossit Ájluovta sjaljov, Divtasvuonan.

Foto: Harrieth Aira/NRK

Sámedikke vuorrasijráde aj sidáj diehtet jus sáme dán institusjåvnån oadtju árbbedábálasj biebmojt, ja sierraláhkáj sáme biebmojt.

Gåjkkebiebmojt dal Ájluovta sjaljon ietja riejddiji, valla málesbiebmo diŋgoduvvi bájkálasj kafeas Ájluovtan diededuváj Ájluovta sjaljo bieles.

– Ep dal fála sierralágásj sáme biebmojt. Mujttet nágin bále lip málestam bájkálasj sáme biebmojt dánna nav gåk mån diedáv, valla biebmojt majt oadtjop kafeas la dábálasj biebbmo majt Vuonan bårri. Ælla da sierraláhkáj hiebaduvvam sáme biebmo. Jus ga dá málesbiebmo ælla sierra sáme biebmo de biebbmo l bájkálasj bårråmus majt ulmutja dáppe bårri, subtsas Aspaas.

–Jur dan diehti má Divtasvuona demænssasiebrre la sierra biebbmotjállusav almodam, Sáme biebmo vuorrasijda. Ja ulmme lij dát biebbmobagádus luluj aneduvvat dákkir institusjåvnån dagu dánná. Valla gå Ájluovta sjaljon ij la gievkan gånnå iehtja máhtti málestit de ij la dal vuordedahtte sij galggi málestit dáj biebbmobagádusáj milta, dættot Sámedikke vuorrasijráde jådediddje, Inga Karlsen.

– Jus ga lij sávadahtte, de ij la miján loahpe málestit dánna dan diehti gå miján ælla da rustiga majt Biebbmooahttse gájbbet, dættot Aspaas.

Inga Karlsen ja Morten Aspaas

Foto: Harrieth Aira/NRK

Ja maŋŋáj dán guossidime Ájluovta sjaljon de vuolggi aj Gásluoktaj, gehtjatjit gåktu vuorrasij sijdda Divtasvuona suohkanguovdásjbájken doajmmá.

– Midjij la viehka ájnas mij mannap ja oadtjop diehtet gåktu vuorrasijsujtto doajmmá, le gus sámegielak bargge, ja tjuovoduvvi gus da gájbbádusá maj milta Sámedikke vuorrasijráde barggá. Dat la ham mijá ássje, javllá Anders P. Siri gut gåhttju ulmutjijt sijáj válldet aktijvuodav jus li ássje majna sihti Sámedikke vuorrasijráde galggá barggat.

– Sihke sáme, sáme suohkana ja iehtáda máhtti midjij buktet ássjijt ja de máhttep midja ássjijt giehtadallat ja tjalmostit dajt, javllá Anders Siri.

Sihti aj politihkkárijt iejvvit

Valla Sámedikke vuorrasij ráde sihti aj iejvvit sijájt gudi mierredi gåktu vuorasulmutjij bæjválasj viessomdille galggá sjaddat.

Inga Karlsen jådet tjåhkanimev. Anders Siri gåråbielen.

Foto: Harrieth Aira/NRK

Dan diehti iejvviji aj Divtasvuona njunnjusj politihkkárijt ja háldadusáv.

Sámedikke vuorrasijráde jådediddjen, Inga Karlsenin, li tjielgga vuorddemusá Divtasvuona suohkanis.

– Mij sihtap diehtet gåktu Divtasvuona suohkan barggá vuorasulmutjij ássjij, sierraláhkáj mijáj sámij ássjij. Ja mij sihtap aj diehtet jus siján li plána gåktu barggat sáme vuorasulmutjij gáktuj, javllá Inga Karlsen.