Maŋimuš ođđasat sámegillii

SÁNAG-kontåvrå vas rahpusi

Diehki Divtasvuodnaj, ja duodden aj Snoasáj ja Osloj, vas ådåsis rahpusij SÁNAG:a bájkálasj kontåvrå.

Foto: Harrieth Aira/NRK

Dat tjielgaj javlaj åvddål gå varresvuodadåjmadahka Varresvuohta Finnmárkko juollodij rudájt dåjmadittjat kontåvråjt Divtasvuonan, Snoasan ja Oslon dáv jagev.

Harrieth Aira

Publisert 16.01.2013 13:01.

Skriv ut
Del/tips

Tone Amundsen.

Foto: Harrieth Aira/NRK

– Mij ham hiejtedijma ietjama lájggimsjiehtadusájt dijmmá tjavtja gå lijma oadtjum diehtet prosjækta ittjij galga joarkeduvvat. Valla åvddålasj javlaj de oattjojma diehtet Finnmárko varresvuodadåjmadahka lij rudájt juollodam jahkáj 2013 ja mij galggap kontåvråjt dåjmadit dán jage aj, subtsas prosjæktajådediddje Tone Amundsen gut jådet dájt gålmmå kontåvråjt SÁNAG:in.

Lågå aj: Ingen kutt ved SANKS

Rahpi kontåvråjt vas ådåsis

Dáj biejvij la SANAG kontåvråjt vas ådåsis rahpamin.

– Mij lip virgijt almodam rahpusin ja doajvvomis li miján ulmutja sajen ruvámus láhkáj. Dan båttå biedjap ietjama barggijt ietjama åssudagájn bargatjit bájkálattjat dasik ulmutjijt lip sadjáj oadtjum, subtsas Tone Amundsen.

Dát la SÁNAG (SANKS)

Sáme nasjonálalasj máhtudakguovdásj – psykalasj varresvuodan (SÁNAG).
La nasjonálalasj åvdåsvásstádus åvddånahttet avtaárvvusasj varresvuodafálaldagájt psykalasj varresvuodan.
Sáme máhtti oadtjot SÁNAG:is dálkudimfálaldagájt jus dav ietja hálijdi.
SÁNAG-in la: ållessjattugijda åssudak, åssudak mánájda ja nuorajda ja dutkam-ja åvddånahttemåssudak.
Gálldo: Helse Finnmark

Hiejtedin ruhtavádnunime diehti

Dijmmá tjavtja hiejtedij SÁNAG mij la Sáme nasjonálalasj máhtudakguovdásj psykalasj varresvuodan, ietjasa bájkálasj kontåvråjt Divtasvuonan, Snoasan ja Oslon dan diehti gå ij lim ruhta des kontåvråjt dåjmadit ma dallutjij lidjin doajmmam sierra gålmåjahkásasj prosjæktan.

SÁNAG iesj hálijdij joarkket dåjmadit dájt bájkálasj kontåvråjt vaj luluj máhttelis fállat dálkudimdievnastusájt psykalasj varresvuodan sámijda gudi ålggolin Finnmárko årru.

Dajt gålmmå jagijt gå prosjækta vibáj de tjalmostuváj dárbbo dákkir fálaldahkaj.

Lågå aj: Bosted kan avgjøre om du får hjelp
Lågå aj: – Det var SANKS som hjalp oss

Ållusa aj vuosteldin gå kontåvrå hiejteduvvin sihke pasienta, fáhkatjiehppe ja aktisasjbarggoguojme. Politihkkára aj oassálasstin dán ságastallamij.

Lågå aj: Sihti bisodit SÁNAG-kontåvråv
Lågå aj: – SANKS-kutt en skandale

Tjuollot manáj

Amundsena mielas sjattaj ållu tjuollot gå dákkir dilláj lidjin boahtám gånnå vuostak mierredin hiejtedit kontåvråjt ja de nágin vahko ja mánno maŋŋel de galggin vas huoman dá kontåvrå bisoduvvat.

– Ij la dal buorre dán láhkáj barggat. Mij ham lijma riek buoragit barggagoahtám, mij lijma ulmutjijt bargguj biedjam ja ulmutja lidjin luohtádusáv oadtjum. Gå de vas vierttijma diededit dássta ij sjatta mige de dåbdduj unugis, dættot sån.

Sån vuojnná hásstalussan oadtjot ådå fáhkaulmutjijt sadjáj ja ådåsis tsieggit luohtádusáv pasientaj gaskan.

– Ij la álkke fáhkabarggijt åttjudit gejn la dat máhtudahka mij gájbbeduvvá. Duodden hæhttujma aj pasientajt duosstot gudi mijás sihtin viehkev gå ællim ressursa vuosstájválldet sijájt. Midjij de sjaddá hásstalussan vas luohtádusáv tsieggit pasientaj gaskan, ja avtaláhkáj dagu ådåsis vas hæhttup barggagoahtet, javllá Amundsen.

Ruhtadibme dán jage

Så tjielgas la de jut dán jage doajmmi dá gålmmå SÁNAGA bájkálasj kontåvrå, valla gåktu boahtte jahkáj sjaddá ij Tone Amundsen gåjt ájn diede.

– Mij diehtep rudá jahkáj 2013 li juolloduvvam valla gåktu sjaddá boahtte jahkáj ij la tjielgas. Mij lip aj oadtjum diehtet mij galggap barggat vaj stuoves fálaldahkan dá kontåvrå sjaddi, valla ep mij diede. Dav majt mij diehtep miján la ruhtadibme dán jage.

GULLDAL ÁSSJEV DÁNNA: