Dav subtsas sáme mannoæládusá viddnudagá Njunjes-dåjmadiddje Anna Kuoljok, guhti l riek ávon gå Nordlanda fylkasuohkana la juollodam rudájt prosjæktaj vaj dat máhttá joarkket boahtte jage.
Anna Kuoljok, dåjmadiddje Njunjes mannoæládusvidnudagán.
Foto: Harrieth Aira / NRK– Mij lip riek ávon gå fylkasuohkan vas juollot rudájt dájda biejvijda, ja vuojnnet sij dájna duodasin válldi mijá bargov, javllá Kuoljok.
Aktisasjbarggo
Nordlanda fylkasuohkan áttjak juollodij 400 000 tuvsán kråvnå prosjæktaj mij merkaj prosjækta lulu joarkket aj boahtte jage.
– Márnán la riek buorre buojkulvis gåktu sáme birrasa Nordlándan ja Oarjje-Råmsån máhtti aktisattjat barggat, javllá Nordlánda fylkasuohkana æládusráde Arve Knutsen præssadiedádusán.
Anna Kuoljok vuorddá aj Sámedigge galggá juollodit Sámedikke oasev prosjevtan.
Hærssko
Vásse tjaktjagiese ásadin moadda sáme mannoæládusviddnudagá ja kultuvrrainstitusjåvnå sáme biebbmomárnánav, Hærssko majt sij dav gåhtjudin.
Dat dáhpáduváj Evenskieren, Skánegin ja lij aktisasjbarggo gaskan sáme mannoæládusviddnudagá ja sáme kultuvrrainstitusjåvnå Oarjje-Råmsån ja Nuortta Nordlándan.
- Lågå:
- Lågå aj:
Ásadiddjij mielas sij riek buoragit vuorbástuvvin dáj márnánbiejvij gånnå sáme biebbmo lij guovdátjin.
Boahtte jage Divtasvuonan
Ja boahtte jage sjaddá sulásj márnán, valla dán bále Ájluovtan Divtasvuonan subtsas Kuoljok.
– Mijá plánaj milta sjaddá biebbmománán boahtte jage Ájluovtan, Divtasvuonan. Jur dálla árvustallap dán jagásj biebbmemárnánav ja gehtjadip jus littji rievddadusá masi l dárbbo. Valla mij joarkkep sæmmi vuodon gå dajna vuojnnet riek buoragit vuorbástuvájma dán jage.
Márnánijn galggi sij joarkket tjalmostit sáme biebmojt ma sijá mielas la vuodo sáme kultuvran dán guovlon. Valla boahtte jage ij sjatta dåssju biebbmo mij la guovdátjin.
– Mij aj usjudallap vuosádallat ietjá åsijt sáme kultuvran ja ij dåssju biebmojt.
Goassa márnánbiejve sjaddi ja gudi dasi oassálassti ij la ga dálla ájn tjielgas. Dat gullu gárvedimbargguj majna sij dálla li barggagoahtám subtsas Kuoljok midjij.