Guovvamánon Divtasvuona, Hábmera ja Stájgo suohkanoajve (STH-nammadus) aktan Sámedikkerádijn tjåhkanin gånnå ságastallam lij varresvuodafálaldagá julevsáme guovlon hiebadahtedum sámij dárboj gáktuj, ja vat ådåsis guovllo medisijnalasj guovdásj (TDMS) ássjijn barggagoahtet.
- Lågå aj:
Sáme ájrrasa nammaduvvi
Sámedikkeráde Ann-Mari Thomassen, Stájgo suohkanoajvve Asle Schrøder, Divtasvuona suohkanoajvve Tor Asgeir Johansen, Gunhild Thunem KUN:as, Hábmera suohkanoajvve Rolf Steffensen ja Sámedikkeráde Henrik Olsen biedjin åjvijt aktan vásse máno.
Foto: Harrieth AiraHenrik Olsen, gejna le varresvuodaássjij åvdåsvásstádus Sámedikkeráden subtsas Sámedikkeráde galggá gålmmå bájkálasj sáme ájrrasijt TDMS-barggojuohkusij nammadit.
– Mij lip bájkálasj siebrijs gatjádallam gudi dakkir barggojuohkusin bierri liehket, ja sijájs vásstádusáv vuorddep.
Olsen diedet sij li niellja bájkálasj siebrijs gatjádallam. Dá siebre li Divtasvuona demænssasiebrre, Sálto Sámesiebrre, Árran julevsáme guovdásj ja Doajmma Siebrre Julevsábme.
– Dá niellja siebre li dán ássjen dåjmalattja læhkám ja tjoahken gåbddudagáv åvdåsti.
Ájggemierre vásstedit la sjnjuktjamáno 17. biejve, mij la boahtte mánnodagá.
– Gå STH-nammadus boahtte bále tjåhkani, de lip mierredam gev sihtap oajvvadit.
TDMS-prosjevtajn joarkket
Sámedikkeráde subtsas ælla ájn oajvvadusájt oadtjum, valla javllá Sálto Sámesiebrre sihtá Sámedikkeráde galggá lagábut mandáhtav tjielggit.
– Mijá mielas bierri barggojuogos iesj mandáhtav mierredit. Valla la luondulasj joarkket dajna bargujn mij la juo álgadum, vásstet Olsen.
Suohkanoajve ja sáme ájrrasa
STH-nammadus aktan gålmmå sáme ájrrasij sjaddá prosjevta barggojuogos.
– Valla barggojuogos iesj mierret jus barggojuohkusav galggi stuoredit, duola dagu fáhkamáhtudagájn jali hiebalgis institusjåvnåj, javllá Olsen.
Olsen nammat muhtema sávvi Sámedigge galggá dán juohkin oassálasstet, valla jur dát ij Sámediggáj gullu.
– Jusska ij Sámediggáj gullu, de máhttep máhtudagájn viehkedit jus sihti.