Såbadibme l prosæssa
Ållo báktjasa ja assme la vuodon gå såbadusprosæssa jåhtuj bådij Vuona girkko baktu dijmmá. Hábmera báhppa Rolf Steffensen jådet dáv prosjevtav, ja vásse disjtagá ásaduváj seminárra Árranin gånnå 80 tjåhkanin gulldalittjat ja ájádusájt nuppij juohket. Steffensen la dájna prosjevtajn jagev barggam, ja vuojnnám la dárbov såbadibmáj ulmutjij ja institusjåvnåj gaskan ja sáme álmmugijn.
Lokalavisa NordSaltenlokalavisa@nord-salten.no
Sander Andersen
Makkár vájkkudusá galggi såbadibmáj? Lågådalle gæhttjalin vuojnojt buktet. Riek ålos lidjin tjoahken, ja gulldaliddje lidjin riek gullisa.
-Ij la såbadus dåssju Jubmela ja ulmutjij gaskan. Såbadibme hæhttu boahtet ulmutjij gaskan jali juohkusij gaskan, subtsastij teologiprofessor Jakob Jervell ietjas lågådin ja vuosedij girkkuj mij åvddåla javlaj sáme hæhttujin dárulattjan sjaddat åvdås gå risstagissan máhttin sjaddat. –Såbadibme la aktisasjvuodan viessot, valla huoman e dárbaha muodugattja liehket. Girkko ándagis ánoj jagen 97, valla ittjij huoman såbadus tjuovo. Dajna l de dasi dálla dárbbo, javlaj Jervell.
Ole Henrik Magga, åvddåulmusj AN’a iemeálmmugij nammadusán, guoskaj Guovdagæjnorijdov mij dáhpáduváj 153 jage dás åvddål, ja suv mielas la girkko tjuodtjum buohta gå badjelgæhttjin sámijt. –Dát la sjievnnjis ájgge girkkuj. Ja esski jagen 1997 oattjojma hávddáj guoddet da guoktáv gudi dalloj Guovdagæjnon gåddujin, javlaj Magga ja jårgaj: -Mån lav iesj vuojnnám gåktu sáme gåtseduvvin, ja gåktu lip mij sáme
vuosstálasstaduvvam. Dan diehti li 1990-jage nav ájnnasa mijá histåvrråj, javlaj Magga. Sån aj vuosedij daj 400 millijåvnås guhti hæhttuji niedastuvvat, ja moattes li aj ájteklándas vuojeduvvam. – Gå buohtastahta nuppe værálda iemeálmmugij, de muhtema javlli sáme e galga luodjot gå nav buoret viessu. Valla mij hæhttup ulmusjriektájt mihttit skándinávalasj tjalmij. Hæhttup gæhttjat mij la spæddjum: hæjosvuohta ja vahágahttem, valla ienemusát dav mij ulmutjav ienemusát vahágahttá: gå ep la oadtjum viessot nav gåktu lij máhttelis, ja nav gåktu bierrip, javlaj Magga. Magga huoman várrodij. - Hæhttup aktisattjat barggat jus ulmusjriekta galggi ålliduvvat. Hæhttup dåbdåstit, ja illastiddje hæhttuji ándagis ádnot, ij dåssju engu, valla ålles vájmos. Divna dát hæhttu prosessa tjadá bargaduvvat, ja duodalattjat ja tjavgga barggat dan diehti. Dåbdåstime dagi ep åvvå álgov oattjo, ja gássjel la val barggat daj ássjij ma li nav báktjasa. Dálla diehtep mij la buorre viessom, ja da la dat mij la hásstalus, hiejtij Ole Henrik magga.
Eiendom
Stillinger
Aktiviteter
Bedrifter
Foreninger
Mest lest
Siste
Annonser
Chat
