Lokalavisa NordSalten
lokalavisa@nord-salten.no Sander Andersen

opplevelse

Istoppen i Helldalen

Klatringen går bratt oppover og merkingen er tidvis dårlig. Helldalisen virker utilnærmelig der isbeen storslått ruver i 1351 meters høyde.

Les mer

Din opplevelse her? | Flere opplevelser

Bæjválasj jådediddje Báhko almmudagán Bård Eriksen javllá gåvvididdje vuostak hæhttuji Sámedikkes dåhkkiduvvat. Báhko álmmudagán li avta galla gåvvididdje gejt adni, ja Eriksen javllá muhttijn la gássjel jus soames gåvvididdjes dagu skihpppá jali ietja sivá diehti hæhkkat e máhte gåvåjt dahkat.

-Muhttijn soajttá nav gåvvididdje ij máhte bargov válldet gå almmudahka sihtá. Dajna de soames girjjeprosjevta hæhttuji sjáhtjaluvvat. Sámedigge dåhkkit gåvvididdjijt, ja gæhttji fágalasj åvddånbuktemvuohkáj gå árvvustalli gåvvididdjijt. Ienemusát guosská dát tjáhpagirjalasjvuodagirjijda, subtsas Bård Eriksen.

Dárogielaga

Eriksen aj adná dárogielak gåvvididdjijt, valla gå galggi sámegielagirjijt gåvvidahttet, de hæhttuji vuostak oadtjot tjoahkkájgæssusav dárogiellaj jårggåluvvam. Dát hiemssi bargov ja dahka nav vaj girjjeprosjevta divrru.

-Sámegielagirjijt jårggålit jali edesik tjoahkkájgæssusav dárruj jårggålit, divrrot ja hiemssidahtta girjjeprosjevtav nav vaj muhttijn ållu maññunip, dajna de lij ållu buoremus jus lij gávnnut gåvvididdje guhti aj julevsámegielav dádjat, javllá Eriksen

Eriksen ij la gæhttjalam gåvvididdjev ietjá sáme guovlojs. Sån usjudallá gájka gåvvididdje e rat julevsámegielav dádjada, ja dajna hæhttu huoman ássjev giehtadallat dagu dárogielagijda.

Ij amatørajt

Sámedikke gåvvididdjekonsulænnta Aino Hivand la moadda gåvåjt gæhttjam ja válljim gåvåjt almmudagáj åvdås. Hivand gæhttjá vuostak makkár perspektijvva l gåvån ja aj ållesvuodav gåvån.

-Gå lav mánusa tjadá låhkåm, de gehtjav gåvåjda ma girjjáj gulluji. Gehtjav makkár åvddånbuktemvuohke la gåvån, ja gehtjav aj vaj la sæmmi åvddånbuktemvuohke ålles girjen. Jus la dárbbo, de buvtáv ævtodusájt stuorrudahkaj ja vájbi ietjá elementajt adnet, giehttu Hivand.

Åvddånbuktemvuohke l ájnas, ja gåvå hæhttuji almma dagáduvvat. Ja de galggi girje sisadnuj hiehpat.

-Gåvå galggi nav buore liehket vaj dåhkki dåssju gåvåj tjadá gæhttjat, de diedá girje sisanov. Dajna de viertti gåvvididdje liehket proffa. Ij de dåhkki amatørajt adnet, subtsas Hivand.

Suv mielas ettjin galga divna girje almoduvvat gå gåvå li nav nievre, ja gåhttju almmudagájt snivva gåvvididdjijt åhtsåt.

-Ij la val dárbbo skåvlåjt vádtset jus galga buorre gåvvididdjen sjaddat. Hárjjidalá, ja de hasodav gåvvididdjijda gåvåjt soames almmudahkaj vaddet ja danna oadtjot diededimev jus li dåhkkidahtte, javllá Hivand.