Lokalavisa NordSalten
lokalavisa@nord-salten.no Sander Andersen

-Mån lav ávon gå besav ietjam duogátja ja ietjam kultuvra birra nuppij nuorajda subtsastittjat. Dasi diedáv la dárbbo, javllá Anne Silja Turi(19) Divtasvuonas.
Anne Silja la aktan Mats Pavvalijn Fuosskos ja Elle Sofe Henriksenajn Guovdagæjnos válljidum sáme oahpestiddjen boahtte skåvllåjage. Jus ij departemænnta dav guhkeda, da la mañemus jahke gå dát gålmåjahkásasj prosjækta l jåden.
Prosjevta ulmme l oabllot sáme kultuvrav, ja sebrudakdilij birra subtsastit ietjá nuorajda Vuonan.
Anne Silja Turi la riek ávon gå la bessam oahpestiddjen, ja sujna l oalle miella dájna prosjevtajn barggat. Ja manen sån jur dasi besaj i iesj rat diede.
-Jáhkáv hiebav dasi. Ietján dal iv lim åhtsåt, ja iv lim ga virggáj biejaduvvat. Ja mån lav nav dudálasj ja ávon gå besav dájna prosjevtajn barggat, giehttu Anne Silja.

Guovte sámekultuvrralasj

Anne Siljan la áhttje guovdagæjnok ja ieddne divtasvuonak. Dajna l sån oadtjum oasev nuorttasámekultuvras ja aj julevsámekultuvras, ja dideon aj goappatja gielajda aj.
-Mån lav mihá gå lav sábme, ja buoren anáv gå dåbdåv ja ságastav guokta sámegiela ja guokta sierra sámekultuvra, javllá sån.
Juska l nuorra, de la Anne Silja juo ålov háhppidam vásedit. Sån la joarkkaskåvlåjn ållim, ja sån la aj lådnomstudænntan læhkám åvdep skåvllåjage. Dan jage lij Ámerigin.
Anne Silja l aj åvdep giese journálisstan barggam NRK Sámeradioa åvdås, ja dajna de la oahpástuvvam barggeiellemijn aj.

Buorep dádjadip nuppe nuppev

Ájnas oasse Anne Silja bargos masi tjaktjaj álggá, la stereotyjpajt gádodit dajs gudi jáhkki sáme li nav ietjálágátja gå ”dábálasj” ulmutja.
-Juska dal miján la ietjá histåvrrå, giella ja kultuvrra, da viessop dagu ”iemelágasj” ulmutja. Mij sáme nuora aj filmajt lájggip, SMS’ajt rádjap, ja dahkap jur sæmmi dagu divna ietjá nuora. Dav de sidáv nuppij ludtjusattjajda subtsastit, ja dasi de jáhkáv la dárbbo. Iv de jáhke divna ietjá nuora dav diehti, javllá Anne Silja ja duoddi: -Jus oadtjop ietjá kultuvra birra diehtet, de buorep dádjadip nubbe nuppev.
Ja bårggemáno maññegietjen la Anne Silja kursan Guovdagæjnon, ja nav dan ådå virgen mij vihpa boahtte skåvllåjagev.
Dajna aj Anne Silja oadtju dáv mijá guhka rijkav miehtáj gålggåt, subtsastittjat ietjas duogátja birra.