Binná asstoájggedåjmajs ásadahttá dáhtáspellamav
Dán vahko lij nuppe bále gå VinterLAN ásaduváj Sebrudakvieson Ájluovtan dálvveloaben. Vuostasj bále lij dijmmá, sæmmi ájge, sæmmi vieson. Ásadiddje mielajs le binná asstoájggedåjmajs Ájluovtan, ja dat le sivvan gå dáhtámasjijnajt aktan biedji værmástahkaj ja spelli dáhtáspellajt idja biejvve 2 jánndura avtatrajes.
Norsk kortversjon
Dán jage lidjin ienep oassálasste gå dijmmá gå VinterLAN 2006 ásaduváj Sebrudakvieson Ájluovtan dán vahko. Jur 2 jánndura gålåj madi nuora dáhtámasjijnajt aktan biedji værmástahkaj spelatjit juogu dal nubbe nuppe vuosstáj, jali internehta baktu. Valla e val dåssju dáhtámasjijnaj duogen tjåhkkåja. Bállotjiektjam- ja marshmallowbårråmgilpos lij aj.
Bájkkeavijssa lij VinterLAN’a guossen dijstagá, ja ságastalájmá avtajn ásadiddjijs, Jørn-Robert Knutsen. Knutsen la riek dudálasj VinterLAN’ajn náv guhkás.
–Ep dal dåssju dáhtámásjijnaj duogen tjåhkkåha. Bállotjiektjamgilppusav lip tjadádam, ja aj moadda ietjá suohtas gilppusa dagu man ållo marshmallowsajt náhká njálmen adnet avta bále. Sujna gut vuojtij lidjin lågenangietja avta bále njálmen, tjajmat Knutsen.
Jørn-Robert Knutsen, akta ásadiddjijs la dudálasj dán jagásj VinterLAN’ajn.Knutsena mielas ælla nav moadda asstoájggedåjma dálvveguovddela nuorajda Ájluovtagátten, ja dat la aj sivvan gå LAN’av ásadi. Valla dát LAN ij la dåssju Ájluovtagijda. -Suohtas le gå ulmutja båhtali ietjá sajijs Nuortta-Sáltos aj, sosialalasj oasse LAN’an le aj viehka ájnas, javllá Knutsen.
Vájku dal moattes sámegielagagijs oassálassti VinterLAN’an, ij huoman sámegiella nav ålov gullu, ja tjálalasj diedo li dåssju dárogiellaj. -Sámastip gå galggap nubbe nuppev viehkedit nav váj dárogielaga e gulá, valla de la dåssju dalloj, javllá Knutsen ja tjajmat.
Aleksander Mikkelsen, Torstein Solstrøm ja Inge Olsen oassálasstin biljardspellamij.
Dán jage lij binnep barggo gárvedit VinterLAN’av, danen gå dijmátjis le ållo sæmmilágásj, ja nuora li hárjjánam dijmátjis. -Valla dán jage li ienep ulmutja, danen ejma le rijbbat jus ejma le ienep ulmutjijt viehkken oadtjot, dåssju gålmås lijma ham álgos. Viehkken le aj gå VinterLAN le ruhtadårjav oadtjum moattet sajes. Ejma le máhttet VinterLAN’av ásadit jus ejma le dajt oadtjot. Duodden lij aj soabmása práktihkalattjat viehkedam dánna sebrudakvieson nav vaj le máhttelis dáv LAN’av tjadádit. Gijttevattja lip divna viehkij ja dårjaj åvdås, hæjttá Knutsen.