Lokalavisa NordSalten
lokalavisa@nord-salten.no Sander Andersen

Rádenålmåj Yvonne Mikalsen ij duosta jáhttet ássjev giehtadalli åvddål giesseloabe.

opplevelse

Kystfolkets Helg

Den 21.-22. juli er det duket for tidenes største Kystfolkets Helg i Helnessund, hvor selveste Ketil Stokkan og Tore Hansen står for rytmene til bryggedans på lørdagskvelden.

Les mer

Din opplevelse her? | Flere opplevelser

-Moattes æjgádijs lij ietjasa iednegielav massám, ælla åvvånis sámegielav oahppam, ja sæmmi dilláj e sidá ietjasa mánájt, jáhkká bæjválasj jådediddje sáme mánájgárden Árranin, Agnethe Johnsen. Johnsen jáhkká dat la aj sivvan gå nav moattes lij dáj mañemus jagij sáme mánájgárddáj åhtsåm, ja tjaktjarájes doajvvu Johnsen ienebujda oadtju sajijt fállat.

Árrana mánájgárden ælla desti saje ienep mánájda, ja soames æjgáda li vilá vuorddemin jus ietjasa mánájda sajev danna oadtju. Tjaktjaj jåhtå álmmukgirjjevuorkká Árranis, ja bargge dajna doajvvu divna mánájda oadtju sajev fállat.

Vuostasj biejve rájes la Árran Mánájgárdde hudjam gå la nav binná sajes, juogu dal sinna jali ålggon. Valla tjaktjarájes doajvvu bargge buorep sadje sidjij sjaddá.

Árrana mánjágárde guoran la uddni suohkana álmmukgirjjevuorkká. Suohkan la mierredam galggi bårggemáno girjjevuorkájn dat lanjás ålgus jåhtet. Dajna de vuojnná mánájgárde bæjválasj jådediddje Agnethe Johnsen buorep sadje sidjij sjaddá, ja nav aj duosstá sajijt æjgádijda fállat.

-Ienep ja ienep æjgáda sihti mánájdisá sajev mijá mánájgárden. Dajna l de munji nav suohtas ja hávsske gå oattjov mánájgárddesajijt vargga divnajda vaddet, valla vájku oadtjop oasev dat lanjás gånnå girjjevuorkká l uddni, de huoman jáhkáv ælla saje rat divnajda, subtsas mánájgárde jådediddje.

Vuorddi sajev

Agnethe Johnsen vuojnná dárbov, ja la aj mihá gå nav moattes Árrana mánájgárddáj åhtsi. Tjaktjaj lij juo 16 máná åhtsåm. 12 li nuorap gå 3 jage.

-Stuorra oasse dájs æjgádijs gudi li mánájdisá sajev dási åhtsåm, lij ietja åtsådallam sámegielav lij massám. Ja diedáv da æjgáda e sidá máná galggi sæmmi vásedit. Ja danen e sidá dárogielamánájgárddáj mánájdisá rádjat, ienni Árrana mánájgárddáj gånnå le máhttelisvuohta sámegielav oahppat, javllá mánájgárde jådediddje Árranin.

Tjaktjaj li juo 3 máná gudi vuorddi sajev. Da máná dal jáhkedahtti sajev oadtju, valla åvdås gå jådediddje duosstá sajijt jáhttet, de hæhttu suohkan dåhkkidit oasev udnásj girjjevuorkká lanjájt mánájgárde lanjájda.

-Åhtsåmus le rájadum, ja doajvov oadtjop vásstádusáv åvddål gå giesseloahpe álggá. Jus bessap dan bælláj, de la miján 5 mánájgárdde saje duodden, javllá Agnethe Johnsen.

Ælla ássjegiehtadalle

Rádenålmåj Yvonne Mikalsen Divtasvuona suohkanin diedet suohkan la åhtsåmusáv Árranis oadtjum, valla ballá ij máhte vásstádusáv vaddet åvddål giesseloabe.

-Miján ij la desti bajássjaddam- ja kultuvrraoajvve. Dajna de ælla ga ulmutja gudi ássjev giehtadalli, ja dan diehti de iv diede jus háhppidip dáv ássjev nav jåhtelit giehtadallat, javllá suohkana rádenålmåj, ja ij ga majdik duosta jáhttet.