Lokalavisa NordSalten
lokalavisa@nord-salten.no Sander Andersen

Peder Pedersen(88), jali ienemusát oahpes Mihkkila-Petterin, la aj várijs ja nuores viessomlájbev viedtjam.

Annonse fra Steigen Vertshus AS

Middagsbuffét

Les mer

Hver søndag kl. 13-18 har vi middagsbuffét til kr. 185,-. Velkommen!

Din annonse her? | Flere annonser

10 jage dás åvddål manáj Peder Pedersen Gånågisá lunna subtsastittjat dárbbo l sierra dåjmajda jus Måsske galggá årromsadjen bissot. Dalloj årrun birrusit 80 Måsken. Skåvlån lidjin dalloj 15 oahppe. 3 sávttsabånndura lidjin, ja boargál lij gånnå oadtju vargga gájklágásj gálvojt oasstet. Duodden aj gålmmå guollárvantsa.

Uddni l ulmusjlåhko lahkkáj binnum, valla e val rat divna Måskes jåde – vájku dal gáktu dille sjaddá.

Lågev jage dás åvddåla lij Måsske viesso sáme årrudahka gånnå ulmutja duov dáv virgev adnin, ja massta aj viessun. Skåvlån lidjin ållo oahppe, ja vihtta åhpadiddje ålles virgen. Duodden aj basse ja hoajddár. Barggokurssa lij aj jådon, ja moattes dav kursav tjadádin guovte jage birán. Duodden lidjin aj asstoájgedåjma ja lásjmudallama juohkka iehkeda, juogu dal skåvlå sisbielen jali ålgusjbielen. Ja oahppe kafeav ásadin juohkka dijstakiehkeda. Gålmmå guollárvantsa gullujin aj Måsskåj.

Binnum

Uddni ælla Måsken gå nieljelåges gudi vilá årru. Stuorra oasse le davás jåhtålam. Vilá ij le rahte Måsskåj boahtám. Ij la desti boargál. Dåssju akta sávttsabåndor le virgen. Skåvlån li dåssju 6 oahppe, ja ælla desti friddjájgedåjma danna dagu dåjt jagijt. Ij la desti oahppijn kafea. Ja hámnan ledåssju akta guollárvanntsa.

”Måske-aksjåvnnå” almodij jagen 1996 Måskev oasen. Vuojnnin Måsske ij bierggi jus e sierralágásj dåjma sjatta, ja jus e barggosaje ásaduvá. Dan aksjåvnå maññela lij Måsske vargga juohkka ávijsan ja måttijn TV-kanalajn. Ulmutja sihtin vuojn Måsken ja Oarjjevuonan årrot.

”Måske-aksjåvnnå” åtsåj rudájt, ja biedjin ulmutjav virggáj mij galgaj Måsskåj barggosajijt åttjudit.

Galla sjaddin soames ådå barggosaje gå luossabiebmadak Måsskåj ásaduváj, valla ælla dal huoman Måsken dálla ienep barggosaje gå lågev jage dás åvddål. Farra binnep.

Hámnnaj la dåssju akta guollárvanntsa báhtsám, valla dåbbelin gårvvu luossabiebmadahka mij Måsskåj ásaduváj gålmmå jage dás åvddål, ja mij le ájnna boados ”Måske-aksjåvnås”.

Håjen

Peder Pedersen(88), jali ienemusát oahpes Mihkkila-Petterin, manáj jagen 1996 Gånågisá lunna subtsastittjat dán aksjåvnå birra, ja juoga dal hæhttu dáhpáduvvat jus Måsske ij galga ávdas sjaddat. Sån aj dan sæmmi manon nammadij rádjálåvsåj viddjurijt.

Petter lij dalloj måvtuk. Vuojnij Måsken dåhkki årrot nuorra ulmutjijda aj, ja dåhkki aj bargosajijt ásadit. Sån vuojnij moadda tjoavddusa, ja doajvoj juoga dal aj Måsskåj vierttij ásaduvvat. Valla ittjij dal åvvå sjatta gåktu Petter usjudaláj.

-Jáhkkiv dal mån galgajma dalloj barggosajijt Måsskåj oadtjot nav vaj nuorap ulmutja máhtti dánna årrot. Valla ij la gåjt dálátjij mige sjaddam, ietján gå dåt luossabiebbmam. Ja gåsi rahte gádoj? Sjávvunin gåjt dajna, javllá Petter ja gæhttja vuonav davás.

Låssåt

Petter ájn háhkaviermij málesguolev bivddá, berunijt iesj sáddji ja vat dåhpu, ja harvuk la ájn muorritjit. Valla sávstajt la de njuovadam soames jage dás åvddåla.

Vájku ij la rahte, jali ettjin nav ållo barggosaje sjatta gåktu Petter doajvov, da la huoman sunji hávskke Måsken årrot.

Petter la vilá måvtuk. Ij sån vuojne Måske håhkkånimev vájku dal ulmutja lij manádam, ja juska dal dåssju avta galla bargosaje lij luosas sjaddam.

Petter aj boargálav åhtsål.

-Mån lav juo 88 jage vuoras, ja lav bajássjaddam dánna. Dáppe sidáv årrot, ja jáhkáv aj iehtjáda dánna sihti årrot vájk gåktu sjaddá. Iv de Måskes jåde. Valla låssåt la gal gå hæhttu davven biebmojt oasestit, ja vantsa mañen suvdatjit, javllá sån.

Petter årru ietjas riek tjáppa ja stuorra dåben Måsken, ja sihtá årrot dánna nav guhkev gå viessu. Doajvvu buorep ájge Måsskåj båhti, ja ulmutja vat sisi jåhtåli – gå dal ájn.

-Ij la val buorep sadje dán væráldin gå Måsken - ij la, javllá Petter mañutjissaj ja tsåggå snuvsajt baksima vuolláj.