Lokalavisa NordSalten
lokalavisa@nord-salten.no Sander Andersen

næringsliv

Nettintro ANS

Infoside

Nettintro utvikler internettapplikasjoner, og vårt hovedprodukt er en publiseringsplattform for små og mellomstore nettsider.

Din bedrift her? | Flere bedrifter

-Gidágiesen luojtijma 66 lippa ja 39 sávtsa várráj guodotjit. Tjavtjan vuordijma ælov sijddaj, valla 24 lippa ælla ájn sijddaj boahtám, subtsastibá sávttsaæjgáda Ann-Britt ja Karl Gunnar Mikkelsen Måskes.

Divna sávtsa li galla vuolus boahtám, valla ælla val divna lippa mañen tjuovvum. Mikkelsena guovtes jáhkkeba lippa lij urudisájda bårrum.

-Dá guokta åvdep jage guododahtijma sávttsaælov vuolládagájn, ja bierggijma divna sávtsajt ja lippajt. Valla dán jage gå gæhttjalijma ælov Ruossavággáj rádjat, ejma vuorbástuva, javllá Karl Gunnar Mikkelsen guhti ij juorrula mij la dáhpáduvvam.

-Gidagiese vallak lippajt ja sávtsajt ålgus luojtijma, de árvvedav riebij soames lippav doahhpij. Valla stuorámus suddár la dal gierkke mij la ienemusájt bahtaj bårråm, javllá Karl Gunnar Mikkelsen.

Mikkelsen la suhton ráddidussaj mij lágajt dahka, ja imájdallá manen bájkálasj politihkkára e dáv ássjev ienebut giehtadalá.

-Sij gudi li fámoj nanna galggin dáv ássjev vieledit juo mælggadav. Jus sihti ulmutja galggi dákkár smávva sajijn årrot, de vierttiji aj dilev láhtjet nav vaj dåkki dájn sajijn viessot. Gå urudisájt ráfeduhtti, da aj mijá viessomlájbbe bårru. Mij de galggap dajt urudisájt biebbmat, javllá KarlGunnar Mikkelsen guhti aj arvustallá sávtsaj hiejttet.

-Ij la má dássta huoman sisboahto. Barggap dåssju stáhta urudisájt biebmatjit, javllá Mikkelsen.

Karl Gunnar Mikkelsena guovtes libá gæhttjalam vuolládagájn sávtsajt guododahttet, valla danna e lippa nav sjatta.

-Lippa e nav sjatta jus fierván galggi guodot. Dajna de hæhttujin bajebuv rádjat, valla de urudisájs bårruji. En de diede majt galggin dahkat, ja gåktu, javllá Mikkelsen ja vuornnu lippa lij várráj muohttum.

- Jus sávtsa ællim sijddaj boahtám, de lij jáhkkedahtte. Iedne lij vuolus boahtám, ja lippa dal galggin diedon mañen tjuovvot. Valla gå dåssju lippa ælla vuolus tjuovvum, de ælla muohttum, javllá Karl Gunnar Mikkelsen.

Karl Gunnar Mikkelsen la gávnadam lippa lij urudisájs bårrum, ja mujttádahttá mañemus gierkke Oarjjevuonan vuotjeduváj 40 jage dás åvddål.

-Dalloj lij dáhpe gierkev bivddet. Jus lij dagu dalloj, de lij vájbi dille ietjá, valla dálla i desti lijssi. Vájbbá má ulmusj náv gillot, javllá sån mañutjissaj.