Oahpponevvaga hiebaduvvi girjjedárogielas ådådárogiellaj: Hæhttu sæmmi lahkáj sámegielan aj
Åhpadusláhka javllá girjje ma almoduvvi girjjedárogiellaj galggi aj sæmmi bále almoduvvat ådådárogiellaj. Sámegielan ij dåjma sæmmi láhkáj. Dát assmá Ájluovta skåvlå rektorav gænna l miella sæmmi lahkáj dahkat sámegielgirjij, ja suv mielas viertti sæmmi riektá liehket sámegielan aj. –Dát la dagu bilkke sámegiela vuosstáj, javllá sån. Norsk kortversjon/Oanegis dárogiellaj
Solveig Skjelnes oajvvat sámegirje almoduvvi divna gålmmå giellatjerdajda avta bále.
Ájluovta skåvlån la birrusij 50 oahppe gudi julevsámegielav låhki, juogu dal vuostasj- jali nuppátgielladásen. Vuostasj biejve rájes la læhkám vánesvuohtá mij guosská oahpponevvagijda, ja vilá l nav, juska dal dille l unnán buorránam dáj mañemus jagij.
Rektor Solveig Skjelnes asmáduvvá gå diehtá girje ma almoduvvi girjjedárogiellaj, sæmmi bále ådådárogiellaj almoduvvi. Suv mielas viertti sæmmi årnik liehket aj sámegiela hárráj.
-Gå girjje almoduvvá sámegiellaj, akta ber makkár sámegiellaj, de viertti girjje almoduvvat duon guovte oajvvesámegielajda aj. Dagu dal girje ma li almoduvvam nuorttasámegiellaj. Dajt de vierttti almodit julev- ja oarjjelsámegiellaj dan sæmmi båttå. Nav de lijma oadtjot ienep girjijt ja diedon ienep máhttelisvuodajt åhpadimen. Sierraláhkáj dal oahppogirjijt ájádaláv massta l nav vánesvuohta gåjt de julev- ja oarjjelsámegiellaj. Dajna årnigijn li máhttelisvuoda ienep girjijt almodit. Nav de ressursajt siesstep, almasjlasj ressursajt, ja aj rudájt, javllá Skjelnes ja imájdallá manen dát årnik ij la juo jådon sáme væráldin.
Hásstalusá
Åhpadusdepartementa duogen la oahppogirjijt åttjudit, ja uddni la Ájluovta skåvlå rektora guovtes aktan soames sámegielaåhpadiddjijn tjåhkanimen departementajn gånnå sihti vuosedit hásstalusájt ma sámegiel åhpadimev tjuovvu. Diedon aj giellaåhpadime birra galggi giehttot.
-Miján li æjgádijs moattes gænna ij la sámegiella iednegiellan. Sij sihti mánájdisá máhttelisvuodav vaddet sámegielav oahppat, ja ájnna máhttelisvuohta sidjij la skåvlå baktu. Vájku dal hásstalusá li stuoraga galggap dav huoman duosstot. Valla jus galggap stuoves ja buorre fálaldagáv vaddet, de la duodden oahpponevvagijda ájnas ienep tijmmaressursajt oadtjot. Dille, mij guosská åhpadiddjijda, la buorránam, valla vájlluji huoman sámegielak åhpadiddje gænna l dagu ieññilsgiella fáhkan, javllá Skjelnes.
Ietjá gielladille
Ájluovta skåvlå rektor aj gåvvi giela dillev åvddåla ja dálla.
-Miján la dálla ådå buolvva æjgádijs ja mánájs. Åvddåla máhttin sámástit, valla ij tjállet ja låhkåt. Dálla l dille unnán ietjájduvvam. Dálla máhtti moattes låhkåt ja tjállet, valla e sáhkada, subtsas Skjelnes guhti de dáj ássjij birra sihtá uddni departementaulmutjij ságastallat gå Ájluoktaj båhti.