Lokalavisa NordSalten
lokalavisa@nord-salten.no Sander Andersen

artikkel

Stuorra biejvve Másken

Les artikkelen

Sjaddá ávvobiejvve Måsken bierjjedagá gasskabiejve, gå Mikal Urheim vatteduvvá Gånågisá ánssidimmedáljav.

Karin Tuolja Jåhkåmåhkes. Åhpadiddje, girjjetjálle ja giellaguru ij vájba iednegielajnis barggamis, valla sáñart aktisasjvuodav dá guokta rijkaj gaskan.

Karin Tuolja la vargga viessomájgev ietjas iednegiela åvdås barggam. Sån la girjijt tjállám, ja måttijt jagijt gielav åhpadam. Karin Tuolja la aj Divtasvuonan ja Hábmerin moaddi mannam giellakursajn åhpadam. Suv bæjválasj virgge l vilá åhpadiddjen, ja åhpat joarkkakursan Sáme Åhpadusguovdátjin Jåhkåmåhken.

Karin Tuoljá mielas la ilá binná aktisasjvuohta dán guokta rijka gaskan giela hárráj. Sunji l miella vat aktisattjat Vuona bielijn barggat dajna gå Vuona bielen la nav ållo giellaluohkko.

Girje Vuona bieles

-Jåhkåmåhken li gålmmå sámegiela, ja julevsámegiella l dagu unnum. Huoman la giella viesso. Kursajt tjadádip, ja moadda nuora aj sámegielav låhki. Valla vuojnáv aj dáppen, Divtasvuonan, giella l åvddånam, ja moattes dáppen gielajn barggi ja låhki, giehttu Karin Tuolja.

Tuolja subtsas Svieriga bielen e desti julevsábmáj girjijt dagá, ja dajna de girjijt adni ma li Vuona bielen dagádum.

-Ij la dal dat midjij boasstot adnet girjijt ma li Vuona bielen dagáduvvam, valla dárbbo l huoman ienep oahppamnevvagijda. Tjálle dal Svieriga bielen gávnnu, valla ælla biedniga systeman, ja da gudi bukti tjállet e rat asta tjállet. Dajna l de dille mijá bielen gássjel, javllá Tuolja ja sjivnnjet dajt julevsámegieltjállijt gudi li dánna Vuona bielen.

-Diedáv dánna gávnnuji soames nuorra tjálle gudi dahki nav buorre bargov, ja dajt de hasodav bargujnisá joarkket, javllá Karin Tuolja.

Anneksav tsieggit

Tuolja mielas ij julevsáme tærmmajuogos rat dåjma, ja sån aj dajna åhtsål aktisasvuodav dá guokta rijkaj gaskan mij giellabargguj guosská.

-Midjij la aj buorren gå giella dán bielen la nav åvddånahttám. Mij dárbahip dijáv, valla e desti Divtasvuonaga dåppen mijá lunna vuojnnu. Åhtsålav dan diehti ienep aktisasvuodav dá guokta rijkaj gaskan. Ja dille l nav sjaddam vaj oalges giehta ij diede majt gåro giehta dahka. Moadda prosjevtaj lulujma aktan barggat ja nav gielav nannit ja åvddånahttet. Dajna da aj vuojnáv Árran galgaj anneksav Jåhkåmåhken dahkat, javllá Svieriga giellaguru.