Lokalavisa NordSalten
lokalavisa@nord-salten.no Sander Andersen

folkets bilder

Lund mellom Øynes og Fauske i vinter.

Flere bilder

Foto: Vidar Øynes

-Jus dåssju lidjiv sámegielav vuodoskåvlå rájes låhkåt, de lidjin mujna nav ållo máhttelisvuoda, javllá Ivar Otto Knutsen ja sáñart gå ij la sámegielav åvddåla låhkåm.

Sån aj vájnnot ádjájt ja áhkojt mánájda sámástit.

Ivar Otto Knutsen (30) la oalle sámegielak. Sån la mánnárájes julevsámegielav gullam, ja aj ságastam. Knutsen la vargga nuoramus dat buolvas guhti nagáj sámegielav suoddjit ja guhti aj vilá sámás, valla ij la huoman goassak berustam ietjas gielav tjállet jalik låhkåt. Ij la ga åvddåla bárep dárbov vuojnnám. Sunji l sámegiella agev læhkám luondulasj, valla huoman dåbddå dagu gielav la muhte rádjáj massám. –Guláv aj dagu lav muhte rádjáj gielav massám, sierraláhkáj dájt mañemus 10-12 jage gå sijdas ierit vuolggiv bargatjit. Valla huoman la giella bissum, giehttu sån.

Vájnnot ádjájt ja áhkojt

Knutsen la tjaktja rájes åhpadimev tjuovvum sámegiellaj gånnå aj oahppá tjállet ja låhkåt, ja sån aj gæhttjá åvddålij guovlluj mij bargguj guosská. Knutsen vuojnná máhttelisvuodajt, valla ienemusát vuojnná árvov ietjas iednegielas, gielas massta l iesj oasse. Vuojnná aj makta dárojduhttempolitihkka l ietjas vuojnov bådnjåm. –Ienemusát la æjgádij vihke gå e ietjasij mánájda sámásta nav vaj gielav bisodi. Valla sij lij aj dat dárojduhttemájges bájnnidum. Dálla li da æjgáda ádjá ja áhko, ja muhttijn ållu imálusjáv manen da ádjá ja áhko gænna l giella ájmon, e sámásta ietjasij áddjovijda ja áhkkovijda. Ja ållu vájnnodav sijájt áddjovijda ja áhkkovijda sámástit, javllá Knutsen gænna li guokta máná, ja gejda dárogielagirjijt låhkå madi iesj danga båttå sámegiellaj dajt jårggål. –Gæhttjalav gåjt, javllá sån ja åhtsål ienep girjijt mánájda.

Boahtte buolvajda

Knutsen ij dádjada manen muhtema e berusta sámegielav oahppat. Suv mielas la árvvo ájnas, giela árvvo. –Viertti má árvvon adnet gå la mijá ietjama giella, ja gå nav binnát julevsámegiella gullu. Gehtjav aj máhttelisvuodajda majt giella vaddá bargo gáktuj, javllá Knutsen ja måråt dajda gudi galggi gielav boahtte buolvajda oahppat jus máná ælla sámegielak mánnágárden jali oattjo åhpadimev skåvlå baktu.

Knutsena mielas la buoremus gielav oahppat juo sijda vuolen, jus la máhttelis, ja sån ij balá vájku muhtema álgon unnán boasstot oahppi jali boasstot javlli. –Buorep la dal gielav oahppat, vájk gåktu. Valla ájnas la aj dagu riekta værbbagietjijda hárjjánit ja nav. Guláv dálla gå muhtema li slaje dajna, ja hæhttuji dagu bágov åhtsåt, valla ij dal dat majdik dagá jus dal huoman hárjjidalli. Vijmak gåjt dal riekta sjaddá, javllá Knutsen.

”Sámearená” ietja sajijn

Knutsen aj nammat læstádiánalasj bienajt majna l iesj bajás sjaddam, ja sån la aj åvddånimev dajn birrusijn tjuovvum. –Sámegiella l vájmogiella. Gå sárnev sábmáj guláv, jali sárnne sámegiellaj jårggåluvvá, de juoga dáhpáduvvá. Sámegiella ienebut vájmmuj dæhppu. Ja muv mielas vierttijma ienebut sámegielav biednagoade uvsaj sisbielen gullat. Jáhkáv sámegiella aj tjadná sámevierregav biednagoahtáj. Jus ij bárep danna gullu, jáhkáv muhtema åhtsi sámearenáv ietjá sajijn, dagu sámecupajn ja nav gånnå oattjo ietjas ”sámevuodav” vásedit, javllá Knutsen ja ballá sån dáj bágoj muhtemijt juolgij nali duolmmu.

Knutsen sáñart gå ij la nuorap jagij sinna juo sámegielav oahppam låhkåt ja tjállet, ja várrot áj jusga diehtá ”dát sábme” l ienebut dåhkkidum dálla gå dåssju soames jage dás åvddåla. –Dárojduhttem ij la vilá jábmám. Munji l gåjt sámegiella riek árvvon, ja dav árvov de aj sidáv ietjama mánájda vaddet, hæjttá riek måvtugis Ivar Otto Knutsen.