Lokalavisa NordSalten
lokalavisa@nord-salten.no Tæksta: Børge Strandskog. Jårggålibme: Lars Th. Kintel

artikkel

Hamarøy som klatredestinasjon

Les artikkelen

Han snakker fortere og fortere, blir varmere og varmere og man merker at pulsen øker. Knut Høivaag blir rimelig sterkt engasjert når det blir prat om klatring. Nå jobber han for å få Hamarøy på klatre-kartet og med seg på laget har han to av verdens beste klatrere.

Bájkálasj kåntåvrra Ájluovtan le oadtjum ienep kåntåvrrå- ja studiosajev, guovte gierde ienep bargge ja galggá buvtadit jienav ja aj gåvåjt. Dát le oassen Sámeradio doajmmalasedimes julevsáme- ja oarjjelsámegiela guovlon. Lågev jage lip juo dal doajmmam ja ep la dåjmav lasedam, valla dálla le dal muddo dåjmav lasedit, javllá ådåsdåjmadiddje Ravdna Buljo.

Juo vuoratjismáno 2. biejve galggaba dá guokta ådåvirggájbiejadum journalista Harrieth Aira (45) ja Sander Andersen (47) vuostasj radiosáddagav sáddit «ådå» studios Ájluovtas. Bæssátjij maññela lip gárvvása sádditjit radio- ja TV-ássje julevsáme guovlos. Dát buktá ådå ja stuoráp berustimev dán guovlluj Sáltoduoddaris oarjját gitta Bálágij nuorttan, ja aj Jielleváre ja Jåhkåmåhke guovlojda Svieriga bielen.

- Duodden julevsáme radioådåsijda ma guokti vahkkuj sáddiduvvi galggaba dá guovtes Ájluovtan mañenagi buvtadit ådås- ja reportasjaássjijt aktisasj nuorttarijkalasj sáme TV-ådåsijda «Oddasat», subtsas Buljo.

Harrieth Aira bådij journalisstavirggáj bargos Sámedikken (Árranin) ja dát le vuostasj bále sån journalisstan barggá. Sander Andersen le juo måttijt jagijt journalisstan barggam Bájkkeavijsa Nuortta-Sálton gånnå vásstedij avijsa sáme biele åvdås. Sån galggá dal vásstedit TV-oase åvdås dåjman bájkálasj kåntåvrån Ájluovtan.

Dálla bæssátjij åvddåla libá NRK-journalistaguovtes NRK Sáme Radion Kárásjjågån nágin vahkov, oahppamin ja oahpásmuvvamin ådå virgijda.

-Råhtto ja dertjestibme le galla årrum. Vehi journalistihkka ja ållo teknihkka – ja guhka barggobiejve. Ja dálla dal kamerakurssaj álggin, subtsas Sander Andersen. Aira-guoktájn libá juo tjadádam dajt hásstalusájt ja ássjijt ma sjaddi vuodon dåjmajda Ájluovtan. Duodden radio- ja TV-buvtadibmáj galggaba aj tæksta-TV’av ja internehtabielev vuorodit ja jådedit.

Dássta dal sjaddá moatte láhkáj ådå mediaárggabiejvve Nuortta-Sálton, jáhkká Sander Andersen. Dav jáhkká aj ådåsdåjmadiddje Ravdna Buljo.

- Julevsáme guovllo ienebuv vuojnnusij boahtá. TV le fábmogis medium, javllá sån - ja javllá TV-buvtadime ma Divtas-vuonan buvtaduvvi soajtti moatten aktijvuodan aj hiehpat NRK Nordlánda sáddagijda.

Tæksta: Børge Strandskog Jårggålibme: Lars Th. Kintel