Lokalavisa NordSalten
lokalavisa@nord-salten.no Børge Stranskog/Idar Kintel

næringsliv

Stokland Bilruter AS

Infoside

Din bedrift her? | Flere bedrifter

Udnásj teknologalasj åvddånahttema diehti máhttá bargov sijddaj "válldet" stádajs rabdaguovlojda, ja dat le guhkev juo bækkoduvvam ájnas oassen jus galggá rabdaguovlojda årudagájt tjuottjodit. Dálátjij de li dá årrum dåssju sága. Valla gå gåbdåbádde-internæhtta rabdaguovllo-suohkanijda boahtá, de vuojnnep muhtema máhttelisvuodajt adni ma teknologijav tjuovvu. Sijddaj jåhttåji....
Gájbbádus le diedon ulmutja hæhttuji sihtat sijddaj jåhttåt – ja de galggá mielos barggovadde guhti máhttelisvuodav dasi vaddá. Egil Olsen Skálltjáj ja suv fámilljaj goappátja gájbbádusá ålliduvájga. Fámillja tjavtjan 2006 jådij Divtasvuonas Bådåddjuj, gånnå Egil lij bargov oadtjum rádevadden Umoe IKT'an. Árragiese dán jage de lidjin vat Divtasvuonan. Ja barggo aj tjuovoj.

- Ielvijma ejma la stádaulmutja. Ja årromgålo ja gássjelisvuoda mánájgárddesajijn lijga oassen gå mierredijma sijddaj Ájluoktaj jåhttåt. Dan diehti lij álkke mierredit gå barggovadde dasi  máhttelisvuodav vattij, javllá Egil. Giesseloabe åvddåla áhkájnis Peggyijn ja mánnáguoktájn Divtasvuodnaj máhtsij, bielle jage maññela gå stádaårron Bådådjon sjaddin.
Umoe IKT le nasjunálalasj viddnudahka, 24 åssudagáj ja 750 barggij. Viddnudahka le álgos oabme IKT-divisjåvnnå Bravidan, mij jagen 2005 Jens Ulltveit-Moe's oasteduváj ja navti oattjoj namáv Umoe IKT. Viddnudahka dálla jådet 1 ½ milliardajda jahkáj, ja rahtjali 100 millijåvnåv båhtusin 2007:n. Viddnudagán li 5 åssudagá Nuortta-Vuonan, Bådådjon, Tråmsån, Harstaden, Måvvån ja dálla aj Ájluovtan!  Kontåvrån Ájluovtan le rijkaoassálasj åvdåsvásstádus rádedimes ja vuobddem visualalasj guládallamis, aj videokonferánssan gåhtjoduvvam. Egil Olsen Skálltje ja Umoe IKT AS li serviceguovdátjij Ájluovtan ásadam.

- Dála l muv kontåvrrå, måjut Egil gå vuoset giehta-PC'av ja mobiltelefåvnåv. Dáj barggamnævoj sån gæhppadit tjanát ietjasav viddnudagá næhttaj ja máhttá barggat jur daj sæmmi dahkamusáj maj Kontåvrån Bådådjon bargaj.
Danna galla sujna 12 guojmmebargga lidjin, valla Ájluovtan le ållu aktu...

- Muhttijn gal åhtsålav barggobirrasis oassen liehket. Valla manádav Bådådjo kontåvrå milta nagin bále mánon. Ja juohkka mánnodagá li miján videokonferánsa, navti gåjt rijbadav, subtsas.
Ja videokonferánsa ja visualalasj kommunikasjåvnnå li jur Egila sierra- ja åvdåsvásstádussuorge. Ásaduskontåvrån Divtasvuonan le aj dan diehti åvdåsvásstádus rádevaddemij ja vuobddemij dan suorgen Nuortta-Vuonan. Dákkir bargujn tjuovvu hálvva ållo manádibme, valla ienemus oasse  kontåvrås dagáduvvá serviceguovdátjis Ájluovtan. Umoe IKT'a ja Egil Skálltje oasste li ienemusát unnep ja gasskasasj viddnudagá, ja aj almulasj ásadime. Viddnudagán li sierraláhkáj stuorra oasste varresvuodasuorgen.

- Dát la suorgge sjatto vuolen. Moaddása vuojnni ålov máhtti siesstet jus digitála tjoavddusijt adni. Dåssju gå guovllomedisijnalasj guovdátjijt Finnmárkon ásadi de birrusij 100 millijåvnå sávvi siesstet. Dá guovdátja lij Universitehtaskihppijviessuj Tråmssåj tjanádum, ja tjiehppe máhtti skihpudagáv gávnnat visualalasj guládallama baktu. Navti manno- ja årromgålojt siessti. Návti le aj ájádallamvuohke sáme varresvuodaguovdátja hárráj Ájluovtan, hæjttá Egil Olsen Skálltje.