Eivor Labba guossit mánnávuoda bájkev. Jusska lav Sverigin årrum guhkes ájgev, de vuolgáv ”sijddaj” gå galgav Strávnjunnjáj, tjajmát sån.
- Dát la máj mijá iellem!
Eivor Labba l mihá ietjas duogátjis ællosujton, ja sihtá joarkket árbev ietjas æjgádijs – moatten láhkáj. Lappa fámilja l boahttsubargujn juo badjel 40 jage barggam.
Lokalavisa NordSaltenlokalavisa@nord-salten.no
Børge Strandskog.
Eivora æjgáda – Marit (Skum) ja Guttorm Labba – lijga ællosáme Garasavvunis, valla jådijga vuostak dåppet Jåhkåmåhkkoj elujn, dassta vas Vuodnaj.
- Jagen 1959 båhtin Fuolldáj, valla nágin jage mańńela vas jåhtin dassta Hábmeli.
Måj Birgitijn lin riegádam Fuolldán, ja vielja munnu, Thomas ja Piera libá riegádam Sverigin, subtsas Eivor. Irgijnis Thomas Kuhmunen libá jáhkásasj Sagfjordbiejvijn Strávnjunjen. Danna vuobddeba duoljijt ja duojev majt ietja libá duodjuham. Vuojnnet duodje l ulmutjij miela millta, ja vuojnnet aj berusti.
Munnuj la dát hávsskes barggo, ja de l suohtas æjgádij árbev åvdedit, gudi aj oassálasstijga Sagfjordbiejvijda måttijt jagijt, javllá Eivor, ja mujttal midjij dat ájes gå bajássjatttaj Strávnjunjen. Buorre mujto li ienemusát dat rájes.
Mij oassálasstijma ællosujttuj mánnárájes. Lidjiv nejtsusj gå oadtjuv ietjam boahtsujt ja merkav. Dálla l vielja guoktán, Pieran ja Thomasin ællosujtto dán guovlon, valla munnun Birgitijn li ájn ietjama boahttsu ælon. Måj oassálasstin duon dán bargguj, jåhtemi, miessemærkkomi ja njuovvami. Dát la dat kultuvrra majna lip bajássjaddam, ja ájnas la munji viessot nav gåktu lip mánnávuoda rájes viessum. Dát la máj mijá iellem.
- Mij dåssju sámástijma sijdan bajássjattadijn. Ságastijma nuorttasámegielav danen gå æjgáda lijga Garasavvunis. Ij lim álkke skåvllåj álgget gå ejma nav ållo dárogielav máhte. Valla åhpajma ruvva, skåvlån ja stågadahttijn ietjá mánáj siegen. Dav majt iv la oahppam de la tjállet ja låhkåt ietjam giellaj. Mån iv máhte tjállet ja iv ga låhkåt máhte sámegiellaj, subtsas Eivor Labba, gut jådij Hábmelis – ja Vuonas – juo nuorran. Sån la årrum Sverigin
ållessjattugin. Eivor la låhkåm bádnedåktårviehkken Stockholman, ja barggá uddni dajna bargujn Gierunin Jusska guhkes ájgev Sverigin la årrum, de manná ”sijddaj” gå vuolggá Vuodnaj ja Hábmeli. Ja dav barggá nav álu gå máhttá.
-Mujna l nanos gullivasjvuohta oarbbenijda. Divna gålmås årru Vuonan, valla æjvvalip nav
álu gåk máhttep. Muv irgen, Thomasin, la ællosujtto Sáltoduoddarin, ja diedon la mujna gullivasjvuohta ja guhkahibme Vuonabælláj. Vuojnnet gåktu sjaddá boahtteájggáj. Soaptsov ja buoragit manná Gierunin, gånnå oattjov barggat ietjam bargov. Åhtsiv bargov Habmelin, bádnedåktårviehkken, valla ittjiv oattjo. Ij la ållu amás ájádus Sverigis jåhttåt.
Tæksta: Børge Strandskog
Jårggålibme: Lill-Tove Paulsen
Eiendom
Stillinger
Aktiviteter
Bedrifter
Foreninger
Mest lest
Siste
Annonser
Chat
