Lokalavisa NordSalten
lokalavisa@nord-salten.no Børge Strandskog/Idar Kintel

opplevelse

Vestfjordseilasen

Norges nest største seilas, fra Nordskot i Steigen og tvers over Vestfjorden til Kabelvåg.

Les mer

Din opplevelse her? | Flere opplevelser

Dijstagá guollimvuogijdiddje Árranin sárnnusijn oassálastij semináran 2007 dutkambiejvij aktijvuodan, rijkajgasskasasj gulldaliddjijda. Tiebmá lij guollim Divtasvuonan ja gåktu dat la rievddam maŋemus lågejagijt, duola dagu dálkádakrievddama diehti – mij lij oajvvetjalmostibme semináran.

Elmar Andersen Vuollnán badjádij, ja dagu ietjá báhtja sån árrat guollimij gieseduváj.

- Áhttje munji friddja åtsåj avtav turnusis, váj bessiv suv maŋen Lofoahttaj guollitjit guhtta vahko. Dalloj lidjiv 12 jagák, jagen 1961, mujttát Elmar. Dat rájes nuorre l barggosadjen læhkám. Nágin jage suvddem- ja merrasuorgen, duola dagu hurtigruvton, valla ienemusát guollimvantsan. Jagen 1985 åstij Elmar ietjas vuostasj guollimvantsav, ja jagen 1993 målsoj sån dav 28 sláhpe guhka vantsajn majt ájn adná. Dajna l vuodnaguollár Divtasvuonan ja jahkásasj oassálasste Lufoahttaguollimin. Elmar la aj Finnmárkon guollimin læhkám nágin jage. Ienemusát la aktu læhkám sjárkan. - Valla maññel gå tsåhkevigev oadtjuv nágin jage das åvddåla, de la mujna ietjes maŋen guollidahttijn, subtsas.

40 jage guollárin li sunji vaddám åtsådallamijt ja vuojnojt æládusá åvddånahttema birra:
- Buorep lij åvddåla, ælla gåjt dan birra guoktáladdama, javllá Elmar Andersen. Valla ij sidá dálkádakrievddamij divna skuldov vaddet nievres dile åvdås.
- Nuorre l báhkkanam. Dan diehti ij la Lufoahttaguollim sæmmi gå åvddåla. Gå mån álggiv, de lidjin moadda vantsa ja ulmutja Lufåhtan. Dálla ælla desti nav moaddása, ájnas sivvan dasi le jáddi  tjoasskásap nuoren gådet, Viestaralása ja Sáttja (Senja) ålggolin. Dálla ienemusát dåssju merragáddejáddi gávnnu gåjt dal Lufåhta sisbielen, várudallá Elmar – gut ajtu vuoset ilá ållo guollim soajttá le sivvan gå muhtem guollelågo lij binnum. Dát guosská duola dagu dav sierralágásj hummárguollimav Divtasvuonan. - Stuorámus hummárguollár vuonan le huoman tjievres. Dav ássjev de lulujma muhtem láhkáj tjoavddet. Dålen, gå ulmutjijn lij ienep aktijvuohta luondojn barggin ja máhttin urudisájt gádodit, dalloj lij buorep stávttja, miejnni vuogijdiddje.
Jahkásasj, stuorra silldáboahtema 80-jagijs ja ådå duhátjage sisi li vájkkudam ietjá guollelågojda vuonan.
- Mån jáhkáv sildá diehti li hágajs ja dassta majt gåhttjop «gasska-sájdden» jali nuohttesájdden binnum, ja ihkap ienep merragáddejáddi li vuonajda båhtalam, javllá Elmar, gut ajtu jáhkká háhkalåhko le vat lassánime.

Akta gássjelisvuohta guollimæládussaj guovlojn, le guollevuosstájvállde ma ålles jagev guolijt duosstu vádnuni.

- Muhtem jábijn hæhttup Lufoahttaj jali Harstaj guolijt dålvudit. Udnásj dieselhattij de árvvedip dat ij la mávsedahtte. Danen de farra ep guolli. Ráddjidum le ham man ålov priváhta ulmutjijda máhttá vuobddet jali iesj bårråt, måjut Elmar. Seminárna maññela sujsta jæsskun jus nuorajt májnnot guollárvirggáj álgget.
Vuogijdiddje snivugit ájádaláj, májnodij valla aj várrodij virggáj álgget:
- Friddja ja vuogas barggo le galla, valla sjárkajn gillot  ij la åvvånis mávsedahtte dálásj nuorajda. Dan diehti iv sidá májnodit guolástussaj álgget. Stuoráp vantsajn barggat le gal ietjá ássje...

Tæksta: Børge Strandskog

Jårggålibme: Idar Kintel