Lokalavisa NordSalten
lokalavisa@nord-salten.no Sander Andersen

næringsliv

Lokalavisa NordSalten AS

Infoside

Lokalavis for Steigen, Tysfjord og Hamarøy.

Din bedrift her? | Flere bedrifter

Ulmutjij gaskan li moadda dábe bissum mij guosská luondo adnemij; luondov vieledit, gálmmijt ráfen dibddet, ja ij gårkåjt vájvedit. Jus ilá dájt elementajt hárdá, de la máhttelis mávseduvá.

-Sámij gaskan li dá dábe sierraláhkáj bissum, valla dálla ietjá ulmusjtjerdajn vuojnnep aj gå berusti dákkár dábijt. Boahtá gåjt dálla ienebut vuojnnusij dagu láttij gaskan. Muv mielas la dát åvddåla læhkám dáhpen ietjá ulmusjtjerdaj gaskan, ja dálla l dát ”vuojññan” vat dagu ienebut vuojnnusij boahtám, ij dåssju sámij gaskan. Muhtema vat sjaddi vargga udnodime gå la mijáj gaskan dát dáhpe vilá viesso, giehttu Jorunn Jernsletten.

Jernsletten la nuorttasábmelasj, Råmsån la bajássjaddam, ja la dájt dábijt guoradallam, sierraláhkáj sámij gaskan.

Jernsletten dåbddå dábijt nuortagij gaskan, ja la aj oarjjelsámij lunna mannam dájt dábijt guoradallamin. Jernsletten ij jáhke dábe li nav ietjáláhkáj julevsámeguovlon gå ietjá sáme guovlojn.

-Ålles Sámen li dal dábe vargga ållu muodugattja. Gávnnuji dal sieradusá, ja diedon aj muhtem ietjá namá julevsámeguovlojn gå dagu oarjjelsámeguovlon. Valla dábe ja subttsasa li muodugattja nav guhkás gå mån dåbdåv ja lav gullam, javllá Jernsletten.

Jernsletten manáj Divtasvuonan vásse vahko semináran ságastittjat tema birra majt gåhtjoj ”Sámij aktijvuohta luonnduj”, ja ságastij aj mij la ájlisvuohtaj tjanádum.

Jernsletten nammat dagu vuorbev muhtemij gaskan gå li dagu guollimin. Ráddna duv guoran oadtju guolev, valla dån i majdik oattjo. Jernsletten vuoset Nils Oskalij guhti subtsas guollevuorbbe la tjanádum gåktu nuorev jali jávrev dåmada: ”Ij galga liehket vieledahtek, bilkkedit, návrodit ja badjelgæhttjat jávrev jali guolev. Guollevuorbbe le ressurssa ja sjivnnjádus mij le aktijvuohtaj ávkken”.

-Mån lav gullam ij galga ilá ålov dagu hágajs guollit. Jus dav dagá, de boahtá háhkamáddo ja duv mávset. Dát dáhpe má vuoset galga luondov vieledit ja guolleressursajt siesstet. Luondov galga tjábbát háldadit, ja ij divna guolev ”loapptet” avta bále, buojkut Jernsletten.

Divtasvuonan la aj gullum gå gårkkåbiesev la bæjsttám, de boahtá gårkkåmáddo duv mávsedittjat.

Åvddåla ettjin jámiguttjajt girkkogárddáj jáve. Hávdde sjattaj gånnå juohkkahasj jámij. Ij lim dal daj ájgij máhttelis jámiguttjav nav guhkás suvddet, ja dajna sjattaj gálmmen. Jernslettena mielas sjattaj dagu aktijvuohta gálmme ja luondo gaskan. Hávdde dajna sjattaj jámiguttja fámujn láddidum, ja dan láhkáj birrusa dagu ietjáláhkáj sjaddin tjielggidum.

-Jámiguttja vilá viessun ”jábmemájmon” ja dagu ”gæhttjin” dajt duobddágijt gåsi lidjin jávedum. Ja nav aj máhttin vájkkudit viessogijt gudi mannin dajn bájkijn, jali aj vuojnnusij båhtin. Gå dal ájádalá, de lij diedon moattes gudi li dán láhkáj vuojñadime, ja ij la dal imáj gávnnuji moadda subttsasa ulmutjij birra gudi muhttijn vádtsi dákkárij nali, subtsas Jernsletten ja buojkut subttsasijn Valnesvuonas gå boadnjásj danna 1950-lågon jámiguttja dávtijt gávnaj, ja dajt unnánasj gehtjadahttijn dåbedastij. Dát jámigusj dáv boadnjátjav sijddasis tjuovoj. Ja ittjij desti sunji ráfev vatte åvdås gå vat dávtijt bårdoj gåktu lidjin.

-Gálmme juo luonnduj gullu, ja dát subtsas vuoset ij galga duohttat majdik mij luonnduj gullu. Dát vuoset aj juoga mij la estetalasj, dagu gå muorav galga miehtses viedtajt ja dav tjáppagit tjuollat. Valla dánna l aj ehtalasj duogásj, javllá Jernsletten.