Lokalavisa NordSalten
lokalavisa@nord-salten.no Birgit Andersen

Annonse fra Steigen Vertshus AS

Middagsbuffét

Les mer

Hver søndag kl. 13-18 har vi middagsbuffét til kr. 185,-. Velkommen!

Din annonse her? | Flere annonser

Dåppe l tjaktja rájes årrum. Eskil avtav jagev ålggorijkan sidáj muossádit, ja válljij nuppát jagev joarkkaskåvlån jur Skotlándan låhkåt. Dåppe låhkå Leith Academy Secondary School:an, 1000 ietjá oahppij siegen. (High School amerijkaieŋŋilsgiellaj)

Dåhku jåhtet lij ållu ietjálágásj ja unnán gássjelis danen gå divna lij ådå. Valla diedon riek geldulasj aj. Fámillja Edinburgh:an le guossodimieddne Patricia ja suv 12 jagák bárnne Josh. Eskil hávsskudallá sunnu siegen ja subtsastallá suv ja guossodimiednes miella le sæmmilágásj, ja nav máhtteba tjåhkudallat ja dåssju suohttasijt ságastallat, tjajmmat ja hávsskudallat aktan. Guossodimieddne barggá skåvllåkantijnán, valla ij Eskila skåvlån. Eskil lanjáv juohká Alejandrojn gut le Chiles. Ladnja l oalle unne, ja dajnas sjaddá diehttelis buorre stuoráp sajev oadtjot, javllá sån.

Eskil subtsastallá nav vájbaj gå lij vahkov dåssju ieŋŋilsgielav sáhkadam. Ållu ietjá dille lij boahtet Knut Hamsun joarkkaskåvlås gånnå li 100 oahppe stuorra Leith Academy:ij. Sjaddá basske ja rihtjam váttsáldagájn gå gájkka 1000 oahppe avta bále sirddeli. Valla Eskil soapttsu riek buoragit skåvlån. Giellas buorep ja buorep sjaddá. Eskil subtsas sån le ietjas ieŋŋilsgielav ednagit buoredam, tjálalattjat ja aj njálmálattjat.

Skåvlån hæhttuji juohkka akta sierra skåvllåbiktasijt adnet. Eskilin le tjáhppis båvså, tjáhppis jali bieddjis skirtto ja alek slipsa. Næjtsojn li sæmmi skåvllåbiktasa, valla sij máhtti aj vuolpov gárvvunit. Skåvlån le riek garra njuolgadusá ma dasi guosská. Ietján li njuolgadusá buorre, javllá Eskil. Skotlándan e åvdepnamájt ane.

- Dánna hæhttup javllat Sir, Mr, Miss jali Mrs.

Eskil danen matematihkkaåhpådiddjev Miss Watson:in gåhttju. Åhpådiddje li oalle tjiehpe, ållagasj matematihkka- ja sebrudakfáhkaåhpådiddje. Suv skåvlån klássajn ælla guhtik klássaladna nav gåktu Vuonan. Danna li åhpådiddjijn guhtik ladnja, ja oahppe hæhttuji sirddet klássalanjáj milta, ja fágaj milta. Eskilin li njiella fága. Psysical education mij le lásjmudallam, modern studies mij le sebrudakfáhka, ja ieŋŋilsgiella ja matematihkka. Suv skåvlån li nuorap ja vuorrasap oahppe.

- Leith Academy:an li oahppe 12 jage gitta 18 jage gaskan, ja nav li aj ållo "smávmáná" váttsáldagájn, subtsastallá Eskil.

Moattes oahpperádnajs e åvvånis diede gånnå Vuodna le. Muhtema diehti, ja soabmása aj binnátjav sámij birra diehti. Ieŋŋilsgiellaåhpådiddje diedij binnáv sámij birra åvdutjis, ja suv mielas lij riek suohtas Eskilij oahpástuvvat.

Vuostasj jagev joarkkaskåvlån lågåj Eskil Knut Hamsun joarkkaskåvlån Hábmerin. Danna vas galggá goalmát jagijn tjaktjaj joarkket. Galggá ållit dábálasjfágasuorgev, diedon ieŋŋilsgiella fáhkan aj. Boahtte ájge sihtá Eskil ietjá rijkajt guossidit. Sujna le ulmme, ij galga kåntåvrån barggat. Valla vuostatjin galggá Eskil sijddaj Vuodnaj. Moarmesmáno 25. biejve sijddaj boahtá. Giesen galggá barggat ja tjáppa dálkken (vuordedahtte tjáppa dálkke sjaddá) hávskudallat. Skotlándan le tjoasskásap gå Vuonan. Eskilin ij la galla nav miella stádas ja rádnajstis vuolgget, gejt ednagit sjaddá åhtsålit. Huoman sån ávvudallá sijddaj boadátjit, ietjas vehkaj ja rádnajda Vuonan, biergguj, sijddadagádum pizzaj ja smávhálmugijda, majt aj la åhtsålam. Eskil la juo gallánam toast:as, mij le væjttalájbbe, majt Skotlándan agev bårri. Ij la gal buoremus biebbmo dåppe. Sijdan Vuonan li biebmo buorep rubmahij, ja la aj njálgep. Ålos Skotlándan bårri gahttungievkanbiebmojt gå basedum chipsa ja hamburgera.

Eskil ávttji jagev ålggorijkan årotjit. Le ihkeva buorre muossádibme ja ållo mujto gal miellaj báhtsi.

- Edinburgh le riek tjáppa stáda mav gájkka vierttiji guossidit, ållagasj maŋŋegiesen, hasot Eskil maŋutjissaj.