Lokalavisa NordSalten
lokalavisa@nord-salten.no Børge Strandskog/Idar Kintel

næringsliv

Nordnorsk Ferdigplen A/s

Infoside

Produserer ferdig plen for Nord-Norge

Din bedrift her? | Flere bedrifter

Mánnán agev lávludij, Lars Andreassen. Dajna l joarkkám. Dálla le almodam histåvrå vuostasj CD:av ådåájggásasj musihkajn julevsámegiellaj. “Bálges” nammasasj CD:an li 13 lávllaga, gålmmå dárogiellaj lávladuvvi, ja akta márkkosámegiellaj. CD:a almodiddje le Báhko almodus Árran julevsáme guovdátjin ja CD:a oajvvetiebmá le bálggá.

Åvddåla li CD:a julevsáme lávllagij almoduvvam, valla da li åvdemusát mánájda dagádum. Navti le musihkalasj dáhpádus gå “Bálges” dálla vuobdeduvvá. CD:av máhtá nágin vuobddemsajijn ålles Sámen oasstet, Árranin jali internehtas diññgut www.arran.no

Boine oahpestiddjen

- “Bálges” åvdåstahttá muv musikálalasj ja persåvnålasj vájaldimev «Juicen» rájes mav vuolodis 18-jagágin tjálliv, gitta vehi ienep iellemij oahpásmuvvam ålmmåj duola degu lávllagin ”Skoalkkal uvsam”. Ienemus oasse lávllagijs li dallutjis gå oahppiv ja aj sihtiv sábmáj lávllogoahtet, javllá Lars Andreassen, guhti iesj ittjij sámegielav mánnán åhpa.

- Mån lav dat buolvas gånnå jur dat lij ienemusát njuolgadus ja ij tjuoldos, valla mån lav agev sávvam julevsámegiellaj lávllot. Dan diehti lidjin vuostasj lávllaga majt sámegiellaj lávlluv jårggåluvvam ietjá gielajs. Akta dajs le “Merrasábmelasj” Mari Boines tjáledum. Boine le aj moatte láhkáj muv musihkalasj oahpestiddjen læhkám.

Aktisasjbarggoprosjækta
- Ietjajnim ij lim giellamáhtudahka buorre, poehtalasj tevstajt tjálátjit. Dan diehti lihtudiv Stig Riemmbe Gælokijn, Svenn-Egil Knutsenijn ja Per-Eric Kuoljokijn. Jus ga mån lev artissta de le CD:a boados aktisasjbarggoprosjevtas. Musihkka ja tevsta li muv åtsådallamijda ja dáhpádusájda tjanádum.

Lars Andreassen le aj aktisattjat barggam Frank Remmanijn gå komponerij guokta tjuojalvisájt. Oattjoj aj loabev ietjas versjåvnåv dahkat Johan Märaka lávllagis “Biegga” ja Bernt Mikkel Haglunda lávllagis “Bena”. Maŋemus nammadum le aj årrum CD:a musikálalasj buvtadiddje ietjas viddnudagájn Riebana baktu.

- Sån le riek buorre bargov dahkam ja lev dudálasj suv barggoártajn ja tjehpudagájn, musikálalasj buvtadiddjen ja aj musihkkárin, oajvvát Andreassen.

Guovsagis

Lars Andreassenin le dálla permisjåvnnå virges Árran julevsáme guovdátja vuolepdirektørran. Sån barggá låhpalasj sebrudakdiedalasj dåktårgrádajn luonndosuodjalime birra sáme guovlojn. Sån le aj dåbdos gå le “tjiehpemus sábme sjáhkan” ja le gárggaluvvam giehttjitlågot buoremus sjáhkka spællarin Vuonan.

40 jagák artistan le áhttje Divtasvuonas ja ieddne Áravuomes Narvika suohkanin ja ietjasav merrasábmen, márkkosábmen ja julevsábmen adná.

- Muv iedne bielen, márkkosáme guovlojn, le giella ájn ienep ájteduvvam gå Divtasvuonan. Dárojduhttem lij nannusap dåppe ja sæmmi ihkap aj vuornnom. Akta lávllagijs; Guovssagasak/Nordlys le muv vásádusáj birra man gássjelis lij sáme identitehtav ¨åvdedit guovlon gånnå sámevuohta lij ja vil uddnik le garrasit stigmatiseridum. Lávllaga refrengav “Guovssagasak, boade vuolus mielkkejubtsav gattsatjit” oahppiv Ann-áhkos ja le ájnna lávlla majt daj guovlojs máhtáv. Dav tjálliv gå galggiv Markomeannu festiválan jagen 2003 spellat, hæjttá Lars Andreassen.

CD prosjækta le Nordlánda fylkkasuohkanis ja Sámedikkes dårjaduvvam.

Tæksta: Børge Strandskog
Jårggålibme: Idar Kintel

Gálldo: Præssadiedádus