Oddmund Andersen
Tjállusa vásse jages
Dálven
Histåvråv divvomin
Oddmund Andersen la akta guoradallijs guhti l ållimin prosjevtajn sáme histåvrå birra Nordlándan, ja tjavtjan almoduváj girjje dán guoradallama birra. Dajna l aj Nordlánda histåvråv ietjájduhttemin, sierraláhkáj dat histåvrrå mij guosská sámij dillev. Oddmund Andersen, guhti bæjválattjat la Árrana dávvervuorká jådediddje, la dat bargos bessam dájt mañemus jagijt gå la dájna prosjevtajn barggamin ietjá guoradallij siegen. Guoradalle lij prosjevtav gåhttjum ”Etnalasj relásjåvnå Nuortta Nordlándan histåvrrålasj vuojnon”.
Gidádálven
Hæhttu vilá boahttsujt Stájgon guododit
Anders Eira gierddisvuohta l nåhkåmin. Juska l boahttsuj viessomájgev barggam, gullá dagu ij desti visjá. Bárnijniská libá boahttsuj Oarjje Fuoldá ja Stájgo gaskav jåhtåm, ja libá aj urudisájt biebbmamin daj boahttsuj ma li sunnu viessomlájbbe. Dan diehti de hæhttuba boahttsujt dálvveguohtomin, Stájgon, guododahttet jagev birra. Oajválattja li esski mierredam galggi gierkev Lånjinjárgas gádodit gånnå Anders Eira giesseguohtom la, valla dat la dåssju akta gierkijs mij la suv boahttsujt gádodam. Dijmmá biestijga bárnijniská 270 boahttsu. Jagev åvddåla 317.
Gidán
Sáñart gå ij la åvddåla sámegielav låhkåm
Ivar Otto Knutsen sihtá ietjas mánájda dav árvov vaddet massta l iesj oasse, ja sån sihtá ietjas iednegielav oahppat tjállet, ja aj låhkåt.
-Jus dåssju lidjiv sámegielav vuodoskåvlå rájes låhkåt, de lidjin mujna nav ållo máhttelisvuoda, javllá Ivar Otto Knutsen, ja sáñart gå ij la sámegielav dán lahkáj åvddåla vieledam. Mánnárájes la julevsámegielav gullam, ja aj ságastam, ja Knutsen la vargga nuoramus dat buolvas guhti nagáj sámegielav suoddjit, ja guhti aj vilá sámás. Valla ij la huoman goassak berustam ietjas gielav tjállet jalik låhkåt.
Rudá åhpadibmáj aneduvvi
Divtasvuona suohkan oattjoj badjelasj 2,1 millijåvnå kråvnå gå giellaháldadusguovlluj oassálasstin ådåjagij rájes. Suohkanoajvve sihtá viehka stuorra oasev dájs rudájs suohkana budsjehta baktu biedjat ieme åhpadibmáj vuodoskåvlån, valla dat ij lim Sámedikke ájggomus. –Rudá e galga ieme åhpadibmáj aneduvvat, javllá sadjásasj Sámedikke presidænnta. Divtasvuona suohkan la akta suohkanijs mij la oasse sáme giellaháldadusguovlos ådåjagij rájes.
Giesen
Sáme buoremus tjiektje
Divtasvuona báhtja nav buoragit tjiektjin Sámecupan Jielleváren vaj vuojttin gájka kámpajt, ja aj ålles cupav. Anders Kristian Kalstad, Adrian Nystø, Preben Paulsen Labba, Viktor Paulsen, Mikael Knutsen, Jonas Kjær, Simen Kjær, Johan Daniel Mikkelsen ja Ingve Hilstad oadtjun guhtik pokálav Sámevuojtton. Ja de TV’aj aj båhtin.
Mihás hárjjidalle Børge Kjær subtsas måvtugis báhtjaj birra gudi Jielleváren amannin gållev viettjatjit.
Tjaktjagiesen
Rabáj duodje- ja sámedájddagalleriav
Måvtugis lij gal sån, divtasvuonak Svenn Egil Knutsen, guhti dájt mañemus jagijt la Råmsån årrum. Sujna lij stuoves virgge Sámedikken, valla åhtsåm la virggefriddja jagev dajna gå la ietjas viddnudagáv vuododam: Arppa Sami Duodje Gallery. -Usjudallam lav juo 2 jage luluj ietjam viddnudagájn álgget, ja dajna de vuododimkursav tjadádiv jagen 2004. Plána ietjájduvvin maññenagi, ja javlaj åvddåla mierrediv galggiv duodjegalleriav vuododit, giehtoj dalloj galleriæjgát gænna lij mærkkabiejvve bårggemáno 25. biejve gå galleriav rabáj.
Tjavtjan
Silldá l sjivnjediddjen, valla aj moassjen
Viessomájgev la guoles ja guollimis viessum, ja dajna aj gullá gånnå gáma gåddå. Sildáv vuorddá, valla huoman håjen sjaddá gå ájádallá mij aj sildáv tjuovvu. –Silldá l sjivnnjediddjen, ja aj moassjen, javllá guollár Elmar Andersen Ájluovtas. Elmar Andersen ávvus gå gullá silldá l vuonaj sisi lahkanime, valla sæmmi båttå aj sjaddá håjen gå ”divna” galggi oassálasstet værálda stuorámus silldáguollimij dán ”suv” vuonan. Ienemusát dal ballá stuorra hávsajs.
Tjaktjadálven
Mannoæládos Måsskåj
Måsken dal dåhkki turistajs aj sisboadov oadtjot, valla huoman ij sjatta dat stuorra viddnudak majt Mannoæládus Hamsutte Rijkan ævtot ietjas diedádusán majt li gåhttjum ”Mannoulmme Hamsutte Rijkka”. Dav jáhkká Keit Solstrøm Måskes, guhti l usjudallam juojnak álgget mij gullu mannoæládussaj. Solstrøm la oanegis láhkáj dáv diedádusáv gæhttjam, ja jáhkká dåhkki Måsken jali Oarjjevuonan æládusáv turistajs dahkat, ja sujna li juo plána gárvvasa.