1. Bájkálasj kulturfámo. Sofia Jannokij duodden Lars Andreassen ja Johannes Formanowski tjuojajga maŋŋe idjaj.
Sámeávvudallam gájkajda
Sálto sámesiebre 30 jage ávvudime aktijvuodan jagen 2009 ásaduváj konseærtta sáme artistajn Sofia Jannok aktan juohkusijn Hábmera Hotellan åvdep lávvodagá.
Tjåhkanimlågo milta, svenska artista guossidibme guovlon buoragit vuosstájváldeduváj. Birrusij 180-190 mávsán guosse oadtjun gullat gå Jannok åvddånbuvtij målsudahkes prográmmav duon dán musihkkasjáŋŋarin, juojgas tjielgga vokálajda, jazz ja Abba tjuojalvisá. Sofia Jannok le ienemusát Svierigin dåbdos gånnå le Sámi Grand Prix’av guokti vuojttám. Ietjas adná ådåájggásasj sáme artisstan guhti moadda musihkkasjáŋŋarijt lávllu. Duodden bájkálasj fámo oassálasstin vaj iehket suksessa sjattaj. Johannes Formanowski ja Lars Magne Andreassen tjuojadin maŋŋe idjaj.
- Lip riek dudálattja iehkedijn ja mijá mielas le buorre gå bájkálasj kulturfámo bessi ietjas åvdedit. Buorre gå sámevuohta sjaddá ienep vuojnnusin ja sadjihin aj dajda gudi ælla sáme. Ájggop ávvudallamav javllamánon aj ávvudallat, javllá NSR’a njunnjusj, Miriam Paulsen.