Vádulâšpalvâlusah

Vádulâšpalvâlusâi ulmen lii ovdediđ vádulij jiešráđálâš cevzim jyehipiäiválâš tooimâin nuuvt pyereest ko máhđulâš. Palvâlusâiguin viggoo väldiđ meddâl meid vádulâšvuođâst šaddee hemâdâsâid já iästuid. Váduliih kalgeh peessâđ eelliđ, toimâđ já puđâldiđ täsiviärdásâžžân eres ulmuiguin já uásálistiđ paargon, oppâmân tâi eres ohtsâškodálâš tooimân.
Vádulâšpalvâluslaavâ miäldásijd palvâlusâid já toorjâtooimâid lii máhđulâšvuotâ uuccâđ, jis vádulâš ulmust láá váádu tâi puácuvuođâ keežild kuhesáigásâš (táválávt ucemustáá ive ääigi) sierânâs vaigâdvuođah piergiittâllâđ jyehipiäiválâš eellim tooimâin.
Vádulâšpalvâlusâin iä lah aherääjih ige mihheen váddujuávkku lah kuođđum laavâ heiviittem ulguubel. Vuoigâdvuotâ palvâlussáid lii kiddâ vádulâšvuođâ tääsist. Vádulâšvuotâ miäruštâlluvvoo vádulâšpalvâlusasâttâsâst jieškote-uv palvâlus já toorjâtooimâ uásild.

Uuccâmluámáttuvâid torjui várás finniih sosiaaltoimâttuv kansliast. Jotteemčujottâs lii Piiskuntie 2, 99800 Ivalo. Puhelin sosiaaltoimâttuv kanslian lii  040-534 3924.
 

Aassâmviäsu nubástuspargoh

Torjuu aassâmviäsu nubástuspargoid pyehtih uuccâđ vädisvádulâš ulmuuh, kiäid lihâdem já jiešráđálâšvuotâ fastâ aassâmviäsustis toovvât váádu tâi puácuvuođâ keežild sierânâs vädisvuođâid. Nubástuspargoin taan ohtâvuođâst uáivilduvvoo váádu vaattâm velttidmettumijd nubástuspargoid vádulii aassâmviäsust já ton aldapirrâsâst. Velttidmettumeh nubástuspargoh láá äššigâžân nuuvtá. Nubástuspargoi árvuštâlmist kiävttoo iššeen el. tiervâsvuođâkuávdáá fysioterapeutij mättim. Nubástuspargoh, moh sajanmáksojeh láá el. uuvsâi kobdedem, njuáidusij huksim, kozzâšij meddâlväldim sehe hiivsig- já poossâmvistij nubástuspargoh.  

 
Aassâmviäsun kullee piergâseh já ruustigeh

Vádulâšpalvâluslaavâ mield kalga kieldâ sajanmäksiđ vädisvádulâš ulmui váádu tâi puácuvuođâ tááhust velttidmettumij aassâmviäsun kullee piergâsij já rakânâsâi kuáhtulâš kuástádâsâid. Piergâseh já ruustigeh, moh sajanmáksojeh láá el. luptimrakânâsah já išánkoččompiergâseh.
 
Persovnlâš iše

Ekonomâlâš toorjâ persovnlâš išedeijee pálkkátmân lii uáivildum taggaar vádulâš ulmui, kote taarbâš ennuu nube ulmuu iše jyehipiäiválâš toimâinis. Vádulâš olmooš pálkkát jieš išedeijes já tuáimá pargoadeleijen. Aanaar kieldâst sajanmáksu čuosâttuvvoo vuosâsajasávt toid vädisvádulijd, kiäin lii vuoigâdvuotâ palvâlusasâmân já kiäin ličij molsâiähtun eellim palvâlemtáálust tâi lájádâsâst.  

Fievridempalvâlusah

Ulmust lii vuoigâdvuotâ finniđ vádulâšpalvâluslaavâ miäldásâš fievridempalvâlus, jis sust láá kuhesáigásávt sierânâs vaigâdvuođah liihâdmist já sun ij váádus tâi puácuvuođâs keežild pyevti kevttiđ almos juávkkujotâlâhriäiduid merettis vaigâdvuođâittáá. Maađhijd puáhtá mieđettiđ táárbu mield pargoostjotemân, oppâmân, ášástâlmân, virkosmitmân já ohtsâškodálâš uásálistmân. Fievridempalvâlusâin äššigâš mäksimnáálá páácá määđhi jiešvástádâs. 

Fievridempalvâlus ij uážu kevttiđ tagaráid tuáhtáristeellim já tiervâsvuođâhuolâttâs mađhijd, moid puáhtá finniđ AIL sajanmáávsu. Äššigâžâst puáhtá leđe meid vuoigâdvuotâ ášástâllâmtorjui sosiaalhuolâttâslaavâ vuáđuld, Keejâ Puárásijpargo – Toorjâpalvâlusah – Ášástâllâmpalvâlus. Lasetiäđuid palvâlemstivrejeijee Martta Peltosist, puh. 040-779 2861.
 
Palvâlusaassâm

Kieldâ kalga orniđ palvâlusaassâm vädisvádulâš ulmui, kote taarbâš váádus tâi puácuvuođâs keežild nube ulmuu iše piäiválâš tooimâin piergiittâlmist oovtmanolâš luándusávt, pirrâmpeeivi jieškote-uv aaigijn tâi mudoi eromâš ennuu. Aassâmviäsu lasseen puáhtá ässee tarbâšiđ sierâlágán ohtâgâslâš palvâlusâid asâmis toorjân tegu päikki- já purrâmâspalvâlus. Palvâlusaassâm puáhtá orniđ palvâlemtááluin, mut meiddei pááikán kelijdeijee toorjâpalvâlusâi vievâst, om. päikkipalvâlem, omâhâštipšotorjuu já persovnlâš išedeijee vievâst.   
 

Palvâlusvuávám

Vádulâš ulmui puáhtá rähtiđ palvâlusvuávám. Vuávám rähtim lii tárbulâš talle ko ovtâskâs toorjâtoimâ tâi palvâlus ij lah tuárvi. Palvâlusvuávám vuáđuld finnee čielgâs äššigâš já suu perruu eellimtiileest, táárbuin já uáivilijn sehe finnejuvvoo olesibárdâs jieškote-uv peelij palvâlusâin já palvâlemmáhđulâšvuođâin. Palvâlusvuávám ráhtá vádulâšpalvâlusâi sosiaalpargee oovtâst äššigâššáin já suu perruin.
Vuávám puáhtá rähtiđ oovtâst eres palvâluspelijguin tâi toos puáhtá lahteđ tiäđuid jo rahtum eres vuáváámijn (vajoidittemvuávám, päikkitipšo palvâlusvuávám, AIL toorjâtooimah jna). Vuávám tärhistuvvoo táárbu mield.
 

Piergâseh, mašineh já rakânâsah, moh tarbâšuvvojeh piäiválâš tooimâin piergiittâlmist

Vádulâš ulmust lii máhđulâšvuotâ finniđ sajanmáávsu tagarij mašinij já piergâsij haahâmkuástádâssáid, maid sun taarbâš váádus tâi puácuvuođâs keežild liihâdmist, viestâdmist tâi persovnlâš jyehipiäválâš piergiittâlmist pääihist tâi rijjâääigi tooimâin. Torjuu puáhtá mieđettiđ eres-uv ko taalhâslâš vajoiditmân kullee išepiergâsáid. Sajanmáávsuh mašinijn já rakânâsâin láá kuorâttâllâmvárásiih. Sajanmáksu lii táválávt peeli uástuhaddeest. Kieldâ puáhtá meid adeliđ tárbulâš maašin tâi rakânâs vádulâš ulmuu kiävtun nuuvtá.   
 

Vuáhádâttâmvalmim

Vuáhádâttâmvalmim ulmen lii vádulâš ulmuu toimânaavcâ ovdedem sehe suu já suu perruu tuárjum. Vuáhádâttâmvalmim uárnejuvvoo iänááš sierâlágán kuursâi häämist el. AIL já ornijdumij tooimâst. Vuáhádâttâmvalmim lii vádulâšpalvâluslaavâ mield kuorâttâllâmvárásâš.
 

Tulkkâpalvâlusah 

www.kela.fi

 
Paijeelmiärásâš spesiaalraavâdkuástádâsah

Ulmui puáhtá sajanmäksiđ váádu tâi puácuvuođâ vaattâm, kuhesáigásávt já merikooskâi tarbâšum spesiaalraavâdvalmâštuvâin já spesiaalpurrâmâšvááljust šaddee paijeelmiärásâš kuástádâsâid. Sajanmáksu lii čonnâsâm meriruutân.

Paijeelmiärásâš pivtâstemkuástádâsah

Ulmui puáhtá sajanmäksiđ paijeelmiärásâš pivtâstemkuástádâsâid, moh šaddeh váádu tâi puácuvuođâ tovâttem pihtâsij táváliist korrâsub nuhâmist tâi tast, et olmooš ij váádus keežild pyevti kevttiđ valmâš ostum pihtâsijd tâi kammuid. Sajanmáksu lii kuorâttâllâmvárásâš.   

Jieijâs kuávlu sosiaalpargei väriduvvoo äigi muuneeld puhelinääigist 12.30 – 13.30 puh. 016 687 274. 
 

Liiŋkah

Kieldâ váduhâšornijdumeh
AIL
Kynnys ry.