16.9.2019 Daniel Munduruku uánihis mainâs “Kaandâš kote ij máttám nievdâđ” anarâškielâlâš jurgâlus lii almostittum

Liŋkkâ mainâsân: Kaandâš kote ij máttám nievdâđ

25.2.2019 Seervi ihečuákkim tuálloo 25.3. tme 17

Anarâškielâ seervi ihečuákkim tuálloo vuossaargâ 25.3. tme 17. Saje almottuvvoo maŋeláá.

4.2.2019 Petter Morottaja seervi mediapargen syeinimáánu loopâ räi

Seervi uđđâ mediapargen lii algâttâm Petter Morottaja ive aalgâst. Suu pargo juátkoo syeinimáánu loopâ räi. Pargoid kuleh ovddii náál lostâ- já kirjetooimâ ovdedem, čäällimkulttur nanosmittem já čälimân kyeskee projektij vuávám já koordinistem. Ohtân uđđâ projektin seervist lii älgimin 100 čälled -proojeekt vuálá kullee uálgiproojeekt 1000 sijđod anarâškielân. Ton ulmen lii pyevtittiđ jurgâlum kirjálâšvuođâ eromâšávt nuorâb lohheid.

8.1.2019 Kalender vuolgâttem ájánâm

Anarâš-kalender materiaal vuolgâttem teddilemlágádâsân ájánij juovlâmáánust materiaal majemuu tärhistem já motomij kuuvij molsom tiet tommittáá, et kalendereh iä lah vala puáttám teddilemlágádâsâst siärván. Teddilemlágádâsân lii onne valdum ohtâvuotâ, já vyerdip vala sist tiäđu, et lii-uv pakkeet jo vuálgám. Kalender vuolgâttuvvoo talle vala seervi jesânáid reivâkovertist, mii meid váldá muáddi peeivi. Tieđettep vuolgâtmist meid täin siijđoin.

Peividum 9.1.2019: Tääl lii tiätu, et kalendereh puátih siärván puáttee oho aalgâst. Vuolgâttem ulmuid álgá talle.

6.12.2018 Tovlááh muštoh -kirje almostum

Kuobžâ-Saammâl Haansâ (Hans Morottaja) čäällim já Kuobžâ-Saammâl Maati (Matti Morottaja) toimâttem kirje, Tovlááh muštoh, lii almostum.

“Tallaa ääigi ulmuuh mainâstillii ennuv jyehimuđusijn fiäránijn já suámálijn persovnijn. Talle lâi asto mainâstiđ, ko ulmuin ij laavim leđe huáppu, já ko eres ääigiájánâsah iä lamaš, nuuvt tego taan ääigi ulmuin láá. Taid mainâsijd Hanssâ lii halidâm vuorkkiđ täin kirjijn amas toh vájálduđ já lappuđ aaibâs”, muštâl kirje toimâtteijee Kuobžâ-Saammâl Matti.

Kirje puáhtá tääl uástiđ njuolgist seervi toimâttuvâst Avelist Toimistokeskus Kultapiiskust seervi haldâttâhhovdâ Jenni Mattilast (haldattah@anaraskielaservi.fi), já ušom täst váhá maŋeláá meid Anarist ovdâmerkkân Duodji shopist Sajosist. Kirje hadde lii 10 €.

26.11.2018: Servi ocá pargeid kielâpiervâláid

Anarâškielâ servi ocá kyehti meriáigásii párnáitipšoo Anarân já Avelân. Pargo puáhtá älgiđ tállân teikâ majemustáá uđđivemáánu aalgâst. Pargosopâmuš ráhtoo kesimáánu loopâ 2019 räi. Pälkki Avainta mield. Pargoost váttoo anarâškielâ sárnumtáiđu já haalu porgâđ párnáiguin. Syergi miäldásâš škovliittâs lii stuorrâ iše. Pargoost tarbâšuvvoo jiečânâs pargouáinu, maaŋgâpiälásij pargovuovij haldâšem, anarâš kulttuur máttu sehe njyebžilvuotâ pargoaaigij háárán.

Rijjâ ucâmušah vuolgâttuvvojeh čujottâsân: haldattah@anaraskielaservi.fi majemustáá 6.12.2018.

20.11.2018: Uđđâ luhâmuš párnáid

Riitta Vesala kirje, Šip šap šapsâ, lii tääl almostum digihäämist. Kirje puáhtá luuhâđ tääl jo-uv issuu.com peht, teikkâ luođiđ olssis taan liiŋkâst.

28.8.2018: Sajasâšvuotâ Aanaar kielâpiervâlist

Aanaar kielâpiervâl taarbâš sajasii nuuvt jotelávt ko máhđulâš. Tárbu ličij čohčâmáánu aalgâst juovlâmáánu loopâ räi, mut aaigijn puáhtá ráđádâllâđ. Vuosâsaajeest lii anarâškielâ táiđusâš olmooš. Jis uáináh jieijâd pargoost piervâlist, vääldi ohtâvuođâ Anarâškielâ siärván haldâttâhhovdâ Jenni Mattilan, puh. 040 357 5844, haldattah@anaraskielaservi.fi.

11.6.2018: Youtube-keesi lii álgám

Seervist lii Youtubest uđđâ kanava, Anarâškielâ seervi Youtube-keesi. Kanavast almostittojeh jyehi ohhoost videoh, main kiävttoo sämikielâ. Kannât meiddei čuávvuđ Anarâškielâ seervi Instagram- ja Snapchat-tilijd, Instagram: @anaraskielaservi, snapchat: @anaraskielas.

Jis halijdah jieš kuvviđ video já almostittiđ tom seervi kanavast, te taa láá ravvuuh.

31.5.2018: Uđđâ nettilostâ almostum

Anarâškielâ servi lii almostittám uđđâ nettiloostâ vuosânummeer. Loostâ nommâ lii tääl Lostâ, mut uáiniđ lâš, tohhee-uvks tot lohheid, vâi keksip-uv vala uđđâ noomâ.  Loostâ puáhtá luuhâđ täst. Loostân lii uccum ruttâdem ihán 2018, mut ep vala tieđe, et finnip-uv tom. Loostâ vuosânummeer lii toimâttâm Eljas Niskanen já máccum Susanna Kaartinen. Luuhâmmohtâ puohháid!

21.3.2018: Anarâškielâ seervi ihečuákkim Sajosist 24.3.2018 12:00

Seervi ihečuákkim uárnejuvvoo Anarist Sajosist tijme 12:00. Tiervâpuáttim savâstâllâđ já káhvástâllâđ! Ihečuákkim maŋa juátkoo kappeerkurssâ, mii álgá tuorâstuv 22.3. Tilálâšvuođâ puáhtá čuávvuđ meid Skype peht. Ohtâvuođâ puáhtá väldiđ ucâmáin Skypest seervi saavâjođetteijee Marja-Liisa Oltuhis, jeđe kalga suáittiđ sunjin. Skype peht ij pyevti njuolgâdâsâi mield virgálávt uásálistiđ čuákkimân já miärádásâi tohâmân.

20.2.2018: Anarâškielâ ravvuuh -kirje almostum neetist

Kuobžâ-Saammâl Maati čäällim já Kotus kuástidem Anarâškielâ ravvuuh lii almostum Kotus nettisiijđoin.

12.2.2018: Anarâš eehid Helsigist 28.2.

Anarâškielâ servi uárnee Anarâš eehid Helsigist 28.2. tijme 16:30-19:00 Kannelmäki kirjeráájust čujottâsâst Klaneettitie 5. Ääšist lii savâstâllâm Facebookist Anarâškielâ orroomvisteest. Tilálâšvuođâst piäsá teivâđ ulmuid, káhvástâllâđ já savâstâllâđ. Ton lasseen smiettâp Facebookist tom, ete maid vala halijdep tobbeen porgâđ.

7.2.2018: Anarâš-loostâ meripeivi 28.2.

Jis haalijd vuolgâttiđ jieijâs čalluu čuávuváá Anarâš-loostân, te loostâ meripeivi lii 28.2. Ton räi puoh čalluuh kolgâččii leđe toimâttuvâst. Čalluid puáhtá vuolgâttiđ ovdâmerkkân šleđgâpostáin čujottâsân anaraslosta@anaraskielaservi.fi. Toimâtteijee fättee meid Facebookist noomáin Eljas Niskanen Pargo.

19.1.2018: Jeessânmáávsuh já čujottâstiäđuh

Muštottep, ete jis haalijd finniđ poostâ peht ovdâmerkkân Anarâš-loostâ, te kannat almottiđ ovdâmerkkân varrim maŋa jieijâs uđđâ čujottâs jeessântiätuvästideijei šleđgâpostáin čujottâsân callee (a) anaraskielaservi.fi. Moonnâm ive peln taan ääši iähtun láá lamaš mottoom verd čuolmah, já Postâ lii puáhtám maassâd jo vuolgâttum Anarâš-loostâid. Lostâ vuolgâttuvvoo puoh anarâššáid, mut kalender tuše seervi jesânáid. Jis kalender ij puáttám moonnâm ive, mut lii ovdil puáttám, láá jeessânmáávsuh pááccám mävsihánnáá. Jis ij lah vises, ete lii-uv máksám jieijâs jeessânmáávsu, te tom puáhtá tärhistiđ haldâttâhhoovdâst šleđgâpostáin čujottâsâst haldattah ( a) anaraskielaservi.fi. Jeessânvuotâ nohá automaatlávt, jis ij lah máksám jieijâs jeessânmáávsu viiđâ ihán.