Tuhháát sijđod nuorâi kirjálâšvuotâ anarâškielân lii uálgiproojeekt, mii lohtâs projektân Čyeti čälled anarâškielân.
Proojeekt kuávdáš ulmen lii pyevtittiđ jurgâlum čaabâkirjálâšvuođâ eromâšávt nuorâb lohhei várás. Juurdân lii, et nuorah jiejah väldiđ aktivlávt uási sehe jurgâlemnáál teevstâi valjiimân já meid jurgâlmân.
Servi haalijd tuárjuđ eromâšávt 12-18-ihásij kielâkevttei luuhâmmaterial pyevtittem kuulmâ suujâst:
- Stuorrâ uási kielâiäláskittemtooimâin čyecih vuálá škovlâahasijd já pargoahasijd sárnoid.
- Nuorah láá kielâ potentialliih čälleeh: sij láá vuossâmuš suhâpuolvâ, mii uáppá škoovlâst luuhâđ já čäälliđ sämikielân.
- Nuorâi várás láá kirjeh anarâškielân vuálá 10, já toh-uv láá uáivildum taan juávhu nuorâbáid; puárásubboid ij lah fáállun mihheen.
Kone siäđus lii mieđettâm Anarâškielâ siärván proojeekt várás 60 000 eurod ivij 2019-2020 ááigán. Ruttâsummijn lii ulmen mäksiđ jurgâleijei já sii stivrejeijei paalhijd. Jurgâlusâi kuástidem várás occoo maŋeláá sierâ ruttâdem.
Algâkiiđâ 2019 servi lii rekrytistmin máhđulijd jurgâleijeid.
Proojeekt koordinaattorin tuáimá seervi mediapargee Petter Morottaja syeinimáánu 2019 loopân.