Anarâškielâ servi lii algâttâm kielâpiervâltooimâ ive 1997. Seervist láá kulmâ kielâpiervâl, main kyehti láá Anarist já ohtâ Avelist.

 

Piervâl-nommâsâš kielâpiervâl Anarist čujottâsâst Siulatie 14 lâi vuossmuš, mii vuáđudui. Toimâ ij álgám tááláá táálust, peic Piervâl varrij toos maŋeláá. Anarist kielâpiervâlpárnááh maneh vuossmužžân Piervâlân. Saje lii 8 párnážân.

 

Aanaar nubbe kielâpiervâl, Piäju čujottâsâst Postimatintie 1 B vuáđudui ive 2011. Ko Piervâlist algâttâm párnááh láá šoddâm váhá, te sij pyehtih juátkiđ piervâleellim vala Piäjust ovdilgo sist šaddeh škovlâliih. Saje lii 8+2 párnážân.

 

Avelist lii ohtâ kielâpiervâl, Kuáti čujottâsâst Puistotie 6. Kuáti vuáđudui ive 2010. Saje lii 8 párnážân. Tipšosaje ucâmân ravvuuh já luámáttuvah láá Aanaar kieldâ siijđoin.