Anarâškielâ kielâjuávus čuákánij vuossâmuu keerdi Kielâkäldee-jotkâproojekt ääigi moonnâm ohhoost. Kieđâvuššâmnáálá lijjii jieškote-uvlágán ääših, Aanaar kieldâ maađijkoolbâin kiddâ stavâlistmân.
Kielâjuáhus jesâneh väljejii kooskâstis saavâjođetteijen Marja-Liisa Olthuis. Sun juátká kiddâ toos, ko uđđâ Sämitigge lävdikuudijnis orniiduvá i. 2016 peln já uđđâ kielârääđi väljee uđđâ kielâjuáhus.
Kielâjuávus tuhhiittij meiddei uđâsmittum stavâlistemravvuid keččâlemnáál máttáátteijeid já iärásáid-uv kiäh taid pyehtih tarbâšiđ. Ravvuuh láá kavnâmist mii nettisiijđoin: Anarâškielâ stavâlistemraavâ
Meiddei ovdil adelum attributsaanij koŋruensravvuuh tärhistuvvojii, já uđđâ avžuumeh spiekâsteh váhá ei. Marja-Liisa Olthuis ráhtám kielâoopâst: Attributij koŋruistem
Eres meridum normiimeh, maid puáhtá leđe ávhálâš tiettiđ:
- Suomâkielâ sääni “termi” lii anarâškielân termâ
- Ruuki vai kuáivuttâh? Kuáivuttâh vuosâsaajeest, mut ruuki meid tohhee
- jälkiehkäisy – maŋa estim (sänilitto)
- “vuáruttiđ” (priorisoida) ij soovâ anarâškielân, pyerebeh láá: adeliđ vuáru, pieijâđ vuosâsajan, prioristiđ, vuosâsajadiđ, ain ohtâvuođâ mield.
- “taldrik” ij lah 3-st. sääni já tot sojá ol. lokativist taldrikkeest
Čuákkim tuhhiittij še lase tiervâsvuotsaanijd, moh puátih nettisijđoid ko láá čallum putesin.
Oles pevdikirje lii tääl mii siijđoin luuhâmnáál: Pevdikirje 11.-12.12.2015
