Takkâ puohháid kiäh lijjii mield vuossâmuu anarâškielâ kielâpuudâst 14.1.! Mij ep lam maaŋgâs tobbeen, mutâ saavah lijjii hittâruuh já meiddei kielâkoččâmâsah pajanii mottoom verd.
Oovtâst smietâim om. tom, mii iäruid lii veerbâin salkkiđ já kuorriđ – tärkkilis iäru ij val selvânâm, mutâ tääl lep puáhtám algâttiđ selvâttempargo. Meiddei nuurrâđ-veerbâ synonymijd (čuággiđ, puáimuđ, rááppuđ, uussâđ, tuáppuđ) já toi merhâšumeiäruid smietâim váhá.
Tastoo smietâim vala muádi nuuvt kočodum false friends -tábáhtus, ađai tagarijd saanijd moh sulâstiteh nubbe nube já pyehtih tondiet siähániđ koskânis. Tagareh láá om.
- tuoppâđ – [MLO; MM] lappaa, vetää
- tuoppiđ – [MLO] muovailla, vanuttaa, huovuttaa
- toppiđ – [MLO] siepata
- tuáppuđ – [MLO] näpistää, varastaa (vähän), poimia, siepata, kerätä, napata; [MM] poimia, sieppailla; näpistellä
- tyeppiđ – [MLO] pöllytä, tupruta (savusta);
- toppâđ – [MLO; MM] sulkea, tukkia
Motomin saanij merhâšumeh láá viehâ alda nubijdis, jis toh láá suorgiittâsah siämmáámuđuš säänist, mut motomin vest iäru lii uáli jo styeres tegu uáinivetteđ.
Saavâid kielâpuudâst nuurâi meiddei Yle Säämi Anarâš saavah -toimâtteijee. Pesâvetteđ kuldâliđ mainâs Areenast táágu (vuolgâttum 26.1.): http://areena.yle.fi/1-2729950
Čuávuvááh puudah…?
Taan oho kielâpuddâ tuálloo jo meridum ääigi, ađai tuorâstuv 28.1. tme. 17-19 Saijoos viäskárist. Mij lep kuittâg finnim macâttâs tast, ete tuorâstâh lii maŋgáid perustum ulmuid uáli kuhes já huápulâš peivi. Anarâškielâ orroomviste -juávhust lii ain juátkoo jienâstem pyeremus ohopeeivist, moos puáhtá pyereest uásálistiđ vala. Jienâstem kávnoo táágu: https://www.facebook.com/groups/264702290230055/permalink/1109075499126059/
Taan oho Kielâpuddâ lii meiddei Facebookist: https://www.facebook.com/events/1558618857788584/
Teivâdop talle!
