Njuhčâmáánu čuákkimist kielâjuávus kieđâvušâi váhá anarâškielâ vookaalvuáháduv já maht tot vaigut sänirähtimân. Tavesämikielâ viggá päiniđ anarâškielâ toin naalijn, ete “vaihtoehto” uáinoo távjá lemin “molsâiähtu” já tutkinto vist “tuđhos”. Távjá tavesämikielâ malli kal tohhee, mutâ kenski ij ain. Magareh vokaleh tain tábáhtusâin toh te kolgâččii leđe?
Kielâjuávus meridij savâstâllâm maŋa, ete tain molsođ-veerbâst suorgiittum saanijn kiävttoo u-häämi.
vaihtoehto = muulsâiähtu
vaihde = muulsân
Vuáđuštâllâm kávnoo veerbâ lattiimist:
molsođ > mulsum; mulsâšuđ
Ko molsođ-veerbâ suorgiitmist puátá vookaalnubástus u:n, lii tanen loogilub ettâđ muulsâiähtu, muulsân. Meiddei viärdádâl om. vookaalnubástus täiđiđ -> taaiđâ; myettiđ -> muotâ.
Siämmáánáál meridui tutkinto = to’đhos (ol. akk/gen totkos), ko tutkâđ-veerbâ sujâttemhaamijd itá-uv vuossâmuu stavâlân o: totká.
Vookaalnubâstusâi ohtâvuođâst normâdui meiddei neljistaavvâlsii -stâllâđ-veerbâin, ete suujâtmist kuálmád stavâlân puátá e talle ko niäljád stavâlist lii e teikkâ i váhá siämmáánáál ko kyevtstaavvâlsij saanijn. Om. kavâstâllâđ:
kavâstelleen ~ kavâstilleen ~ kavâstâlleen.
Tievâslâš miärádâs kávnoo čuákkim pevdikirjeest 13 § puotâ: Čuákkim 03/2016
