Anarâš kalender mield kyeli tuáppee taan ohhoost. Ulmuuh kiäh njielih kuolijd tegu kähteeh láá moovtâ. Anarâš ko maccâ kuáláástmist, te sust puáhtá koijâdiđ ”Kalle-uv kuolijd kodáh?” teikkâ “Maggaar lâi kyeli-immeel?” Jis iä kyeleh kuddum, te vástádâs sáttá leđe “Ij lamaš kyeli-immeel kuáttun” teikkâ “Ain kyeli čääsist, jos ij ain väärpist”. Liijkás ennuvgis ij koolgâ kuálástiđ, mudoi sáttá keevvâđ nuuvt, et jävri huáihád.
- Njiälá kuolijd tegu kähtee – Puáhtá ettâđ ulmust, kii mielâstis porá kuolijd
- Kalle-uv kuolijd kodáh? – Kuddih-uv kuolijd?
- Maggaar lâi kyeli-immeel? – siämmáš ko oovdeb
- Ij lamaš kyeli-immeel kuáttun. – Jiem koddám kuolijd?
- Ain kyeli čääsist, jos ij ain väärpist – Kuddim hyeneeht
- jävri huáihád – kyeleh noheh
Mii taat lii?
Čääsist čuážžu, enâmist uáđá, čalme njuollân.
Čääsist čuážžu, koškenâmist ij čuážu.
Jyelgih keeđgist, njiecâkkâsah lääigist já uáivi peesist.
Keesi porá, ij kuássin kallaan, täälvi ääitist uáđá.
Vástádâs puáhtá vuolgâttiđ čujottâsân: info@giellagaldu.com
Käldeeh:
Idström, A.; Morottaja, H. (2015) Inarinsaamen idiomisanakirja. Aanaar: Sämitigge. 4. teddilâs.
A.V.Koskimies; T.I.Itkonen (1978) Inarinlappalaista kansantietoutta. Helsinki: suomalais-ugrilainen seura. Toinen, uudistettu painos.
Kove: Jasmin Kangasniemi
