Kielâpiervâlist Anarist máttááttillii kárdum. Kooveest kielâ, kevidâh ja kärdi.
Anarâškielân taan koččâmâš puáhtá tulkkuđ kyevtináál. Ko anarâškielâ lii nubben kiellân oppum uáli maŋgâsist, te vaarâ vuossâmužžân juurdâš, ete tääl lep staaviimin sajehaamijd, täsimolsomijd, vookaalkukkoduvâid ja maid peri. Toovláš anarâš vaarâ kuittâg addiiččij váhá eresnáál já vistig jurdáččij koijâdeijee mielâtteemmin, jis lii vala muottuuttes čohčâ teikkâ joba kesiäigi.
Kuohtuin saanijn láá kyehti merhâšume. Kielâ meerhâš tiäđust-uv kielâ, mon olmooš sárnu teikkâ čáálá já toin naalijn viggá uážžuđ ohtâvuođâ nube ulmuin. Nubelágán kieláin puáhtá te peessâđ ohtâvuotân tiänásáin, jis lii pyeri riävskáihe. Kielâhân lii meiddei segis ryevdilääigist punnjum pivdempiergâs, mii tiällájuvvoo kevidâhhân. Kevidâh lii ávus jotteemräigi käärdist, mii lii rissijn rahtum ääiđi sullâsâš rááhtus.
Adai jis áigu peessâđ kielâid oppâđ, ferttee vistig huksiđ käärdi, adai kárduđ, tiäđust-uv saajeest maht riävskáh joteh. Káárdán kalga pieijâđ keviduv, já kevidâhhân kielâ. Čuávuváá peivi puáhtá ko eelliđ keččâmin lâš-uv kielâin mihheen, adai oppâđ taid. Čepis riävskápivdee lii-uv jieijâs náál ollâoppâm kielâčeppi!
Käldeeh:
- Morottaja, M., Sammallahti, P.: Säämi-suomâ sänikirje, Girjegiisá 1993.
- Linnanmäki, T.: Hitruu 2 – Pennuuseibi, Sämitigge 2015.
Kove: Heli Aikio / Anarâškielâ kielâpiervâleh
