Jis tun varriih Suomân
Pargen Suomân
Tun puávtáh uážžuđ Kela torjuid, jis poorgah Suomâst. Talle tun jieh taarbâš aassâđ Suomâst pisovávt.
Tuu vuoigâdvuotân uážžuđ Kela mäksim torjuid vaaigut tot, ete ánsášah-uv tun ucemustáá suulân 726 eurod mánuppaajeest. Tust lii vuoigâdvuotâ Kela torjuid toin mánuppoojijn, ko puáturääji tiävá.
Jis tun poorgah Suomâst ucemustáá 6 mánuppaje, te tust lii vuoigâdvuotâ Kela mäksim torjuid 3 mánuppaje ääigi porgâm nuuhâm maŋa.
Jis tust lii Suomâst päikkikieldâ, te tun uážuh tipšo almos tiervâsvuotâtipšoost, táválávt jieijâd kieldâ tiervâsvuođâkuávdáást. Jis tun puáđáh Suomân paargon já tust ij lah päikkikieldâ, te pivde Kela selvâttiđ, ete lii-uv tust vuoigâdvuotâ almos tiervâsvuotâhuolâttâsân.
Sosiaaltorvosopâmušstaatâin värrejeijee pargeeh
Suomâ lii toohâm motomij statâiguin sosiaaltoorvon kyeskee sopâmušâid.
Taah staatah láá
- Australia
- Chile
- Kanada (já Quebec)
- India
- Israel
- Kiina
- Maadâ-Korea
- Ovtâstumstaatah
- Tave-enâmeh.
Sopâmušah kyeskih táválávt iäláttuvváid. Jis tun puáđáh tain staatâin, te täärhist Kelast, ete maht sopâmušah vaigutteh tuu sosiaaltoorvon.
Vuolgâttum pargeeh
Jis tuu pargoadeleijee vuolgât tuu Suomân paargon eres ko EU-staatâst, Eta-staatâst tâi Sveitsist, te tunjin kyeskih siämmááh njuolgâdusah ko eres pargeid.
Tust lii vuoigâdvuotâ Kela torjuid, jis tun varriih Suomân pisovávt tâi jis tuu pälkki lii ucemustáá suulân 726 eurod mánuppaajeest.
Jis tun puáđáh vuolgâttum pargen nube EU-staatâst, Eta-staatâst tâi Sveitsist, tun kuulah tuu vuolgâstaatâ sosiaaltoorvon. Tun uážuh aakuut puácuvuođâ vaattâm tipšo Suomâst siämmái hoddijn ko eres Suomâst ässee ulmuuh, jis tust lii eurooplâš pyecceetipšokorttâ. Tun uážuh koortâ tuu vuolgâstaatâst.
Tuu vuolgâstaatâ virgeomâhâš addel tunjin tuođâštus tast, ete tuu pargoadeleijee lii vuolgâttâm tuu Suomân paargon.
Jis tun puáđáh vuolgâttum pargen staatâst, moin Suomâst lii sosiaaltorvosopâmuš, te tun uážuh sopâmušâst mainâšum torjuid vuolgâstaatâst.
Tun puávtáh uážžuđ eres ko sopâmušâst mainâšum torjuid Suomâst, jis tun lah varrim teehi pisovávt tâi tuu pälkki lii ucemustáá suulân 726 eurod mánuppaajeest.
Porgâmân vuáđuduvvee eres ko Kela sosiaaltorvo
Jis tun poorgah Suomâst, te tun puávtáh uážžuđ meid porgâmân vuáđuduvvee sosiaaltorvo. Toh láá ovdâmerkkân pargoiäláttâh, tiänásân čonnum pargottesvuotâtoorjâ sehe pargoparttijd já áámmáttavdáid kullee torjuuh. Taid mäksih priivaat táhádâsfinnoduvah, pargottesvuotâkaasah já siättuseh. Kela ij talle määvsi taid.