Jis tun varriih Suomâst olgoenâmáid
Jis tun varriih olgoenâmáid, te almoot tast Kelan, jis tunjin máksoo miinii Kela torjuid.
Almoot Kelan meid, jis tuu tile muttoo, ko tun lah olgoenâmijn. Muttum puáhtá leđe ovdâmerkkân
- uápui algâttem tâi lopâttem
- pargo algâttem tâi lopâttem
- nubástus tuu perâkoskâvuođâin, tegu näimi-iäránem tâi varrim oohtân pelikuoimijn.
Koskâpuddâsâš vâi pisovâš varrim?
Tuu vuoigâdvuođah Kela torjuid čuávdojeh táválávt ton vuáđuld, ete mon kuhháá tun ááiguh leđe olgoenâmijn.
Jis tun ááiguh leđe olgoenâmijn vuálá 6 mánuppaje, te tust lii ton ääigi táválávt vuoigâdvuotâ Kela mäksim iäláttuvváid, pärnilasan, enijtorjui já eres pärniperruu torjuid.
Jis tun varriih pisovávt olgoenâmáid, jieh pyevti innig táválávt uážžuđ Kela torjuid. Varrim annoo pisovâžžân, jis lii uáivildum, ete tot pištá paijeel 6 mánuppaje. Talle tuu vuoigâdvuotâ Kela torjuid nohá táválávt tállân, ko tun varriih Suomâst. 6 mánuppaje äigirääjist puáhtá spiekâstiđ, jis tun varriih Suomâst EU-riijkân, Eta-riijkân tâi Sveitsin koskâpuddâsávt.
Ko tun varriih nube staatân, te vääldi čielgâs, ete puávtáh-uv uážžuđ torjuid tuu uđđâ aassâmstaatâst.
Jis tun poorgah staatâ virgeest, tust lii vuoigâdvuotâ Kela torjuid meid talle, ko aasah olgoenâmijn. Jis tuu perruujesâneh vyelgih fáárun, te sij kalgeh almottiđ varriimist Kelan.
Meid ovdâmerkkân uáppein já pargoadeleijee vuolgâttem pargein puáhtá leđe vuoigâdvuotâ Kela torjuid, veikâ sij láá olgoenâmijn paijeel 6 mánuppaje.
Uási ivveest olgoenâmijn
Jis tun aasah olgoenâmijn kiärdulávt paijeel pele ivveest, te tust ij lah táválávt vuoigâdvuotâ Kela torjuid. 6 mánuppaje äigirääjist äigirääjist puáhtá spiekâstiđ, jis tun aasah uási ivveest mottoom EU-riijkâst, Eta-riijkâst tâi Sveitsist.