Kela mäksim iäláttuvah
Jis tun jieh uážu pargoiäláttuv tâi jis tot lii ucce, te Kela máksá tunjin aalmugiäláttuv. Kela máksá meid táhádâsiäláttuv, jis tuu eres iäláttuvah pääcih uáli uccen tâi tun jieh uážu maiden eres iäláttuv.
Aalmugiäláttâh
Tun puávtáh uážžuđ aalmugiäláttuv tuše, jis tun jieh uážu ollágin pargoiäláttuvâid tâi jis tun uážuh taid enâmustáá suulân 56 e/mp. Jis tun uážuh pargoiäláttuvâid eenâb, te aalmugiäláttâh lii ucceeb tâi jieh uážu tom ollágin.
Aalmugiäláttuv oles meeri lii suulân 663 e/mp. Jis tun lah parâkoskâvuođâst, te aalmugiäláttuv meeri lii suulân 592 e/mp.
Aalmugiäláttâh puáhtá leđe ucceeb, jis tun lah váldám aalmugiäláttuv toledum puárásijiäláttâhân ovdil 65 ive ahe. Aalmugiäláttâh puáhtá leđe ucceeb meid talle, jis tun lah aassâm olgoenâmijn. Koijâd olgoenâmijn aassâm vaikuttâsâst aalmugsiäláttâhân almugijkoskâsâš tilálâšvuođâi palvâlemnumerist 020 634 0200 (suomâkielân).
Aalmugiäláttuv ucedeh
- pargoiäláttuv
- eres tuu uážžum iäláttuvah já sajanmáávsuh.
Aalmugiäláttuv iä ucceed
- pelikyeimi puáđuh
- párnái tipšo ääigi nurrum iäláttâh
- uápui jotteem ääigi nurrum iäláttâh
- pargonavcâttesvuotâiäláttuv kerdialedem.
Máávsáh viäru Kela iäláttuvâin já pargoiäláttuvâin.
Aalmugiäláttuv puáturääjih
Tun jieh kannat uuccâđ aalmugiäláttuv, jis tuu eres iäláttâsah já sajanmáávsuh láá eenâb ko puáturääjih.
Kela ij toovâ miärádâs aalmugiäláttuvâst tâi táhádâsiäláttuvâst ovdil ko lii čielgâs, ete mon ennuv tun uážuh eres iäláttuvâid.
Tun puávtáh uážžuđ aalmugiäláttuv, jis tuu eres aalmugiäláttâhân vaiguttâm iäláttuvah já sajanmáávsuh láá ucebeh ko čuávuvááh puáturääjih:
- parâkoskâvuođâst ellee suulân 1 226 e/mp
- ohtuu ässee suulân 1 368 e/mp.
Puáturääjih uáivildeh bruttopuáđuid. Tain ij lah kepidum viäru. Puáturääjih sättih leđe ucebeh, jis tun lah aassâm olgoenâmijn.
Luuvâ lase Kela iäláttuvâi euromeerijn já puáturaajijn (suomâkielân).Táhádâsiäláttâh
Táhádâsiäláttuv puáhtá uážžuđ tuše Suomâst ässee iäláttâhlâš. Tom puáhtá uážžuđ, ko lii aassâm Suomâst ucemustáá 3 ive.
Táhádâsiäláttuv oles meeri lii suulân 835 e/mp. Jis tun jieh uážu maiden eres iäláttuvâid, te tun uážuh oles táhádâsiäláttuv.
Táhádâsiäláttâh lii kuittâg ucceeb, jis tun lah uuccâm ovdil iäláttâhave toledum puárásijiäláttuv. Talle puáhtá keevvâđ tienuuvt, ete tun jieh uážu táhádâsiäláttuv.
Táhádâsiäláttuv kepideh meid
- aalmugiäláttâh
- pargoiäláttuvah
- leeskâiäláttuvah
- eres iäláttuvah, meid tun uážuh.
Toh kepiduvvojeh ollásávt oles táhádâsiäláttuvâst.
Táhádâsiäláttuv ij keeppid ovdâmerkkân tipšotoorjâ, aassâmtoorjâ, pargopuáđuh, omâdâh tâi pelikyeimi puáđuh.
Peerâkoskâvuođah iä vaaikut táhádâsiäláttuv miärán.
Koijâd olgoenâmijn aassâm vaikuttâsâst táhádâsiäláttâhân almugijkoskâsâš tilálâšvuođâi palvâlemnumerist 020 634 0200 (suomâkielân).