Pargomarkkântoorjâ

Jis tun jieh pyevti uážžuđ tiänáspeiviruuđâ tâi vuáđupeiviruuđâ, te tunjin puáhtá mäksiđ pargomarkkântorjuu. Tom puáhtá uážžuđ 17–64-ihásâš pargottes pargo-occee, kote áásá fastâ Suomâst. Pargomarkkântorjuu äigi ij lah räijejum.

Tun uážuh pargomarkkântorjuu, veikâ tuu pargoost orroom iähtu ij olášuu adai tun jieh lah lamaš pargoost tarbâšlii ääigi. Tun uážuh pargomarkkântorjuu meid talle, ko tun lah uážžum tiänáspeiviruuđâ tâi vuáđupeiviruuđâ 400 peivid.

Pargomarkkântorjuu iä määvsi olgoenâmáid.

Pargomarkkântorjuu uážžumân láá raijiittâsah, jis tun lah vuálá 25-ihásâš tâi jis tust ij lah áámmátlâš škovlim. Täärhist PI-toimâttuvâst, ete puávtáh-uv uážžuđ pargomarkkântorjuu.

Mon ennuv pargomarkkântorjuu finnee?

Pargomarkkântoorjâ lii 33,78 eurod peeivist. Pargomarkkântoorjâ lii talle siämmáá styeres ko vuáđupeiviruttâ. Torjuu styeresvuotân vaigutteh kuittâg motomin vaanhimij puáđuh.

Pargomarkkântoorjâ máksoo 5 peeivi ohhoost. Toorjân lasettuvvoo aledem, jis tust láá huolâttemnáál päärnih. Tievâs pargomarkkântoorjâ lii suulân 726–942 eurod mánuppaajeest.

Pargomarkkântorjui puáhtá mäksiđ aledemuási. Tot máksoo PI-toimâttuvváin soppum toimâi ääigist, kuittâg enâmustáá 200 peeivist. Aledemuási lii 4,80 eurod peeivist.

Tun máávsáh viäruid pargomarkkântorjust.

Luuvâ lase pargomarkkântorjuu ucâmist (suomâkielân).

Eres puáđuh vyeledeh torjuu

Puoh tuu jieijâs puáđuh vyeledeh pargomarkkântorjuu mere. Jis tust láá omâdâhpuáđuh, meid toh vyeledeh torjuu mere.

Omâdâhpuáđuh láá ovdâmerkkân láigupuátu, uásuspuátu já vyebdimvuáittu.

Jieijâs omâdâhpuáđuh iä kuittâg vaaigut pargomarkkântorjui, jis

  • tun lah tiävdám 55 ihheed já tuu pargoost orroom iähtu lii olášum ovdil ko tun paaccih pargotteemmin
  • tun uásálistáh PI-toimâttuvváin soppum tooimân.

Vaanhimij puáđuh vyeledeh torjuu, jis tun aasah sunnuin. Tun uážuh kuittâg ain ucemustáá pele tuu pargomarkkântorjust. Vaanhimij puáđuh iä vaaigut, jis tun uásálistáh PI-toimâttuvváin vuávájum tooimân.

Tun puávtáh rekinistiđ Kela viermisiijđoin, mon ennuv pargomarkkântorjuu tun uážuh (suomâkielân).