Pargoost olgoenâmijn
Porgâm EU-staatâst, Eta-staatâst tâi Sveitsist
Jis tun algâttah pargo kostnii EU-staatâst, Eta-staatâst tâi Sveitsist, te uánihis-uv porgâm vaaigut tienuuvt, ete tust ij lah innig vuoigâdvuotâ Kela torjuid.
Puávtáh kuittâg uážžuđ torjuid ton riijkâst, kost tun poorgah. Tun puávtáh uážžuđ torjuu, veikâ jieh asâččii ton riijkâst, kost poorgah.
Pargeeh kuleh tuše oovtâ staatâ sosiaaltoorvon ain häävild. Te tun jieh pyevti siämmáá ääigi kuullâđ Suomâ sosiaaltoorvon, jis tun kuulah monnii eres staatâ sosiaaltoorvon.
Räjipargeeh
Räjipargee lii olmooš, kote máccá kiärdulávt jyehi peeivi tâi ucemustáá ohtii ohhoost suu pisovâš aassâmstaatân.
Jis tun poorgah räjipargen nube EU-staatâst tâi Eta-staatâst, te tust lii vuoigâdvuotâ tuu porgâmstaatâ torjuid. Torjuu uážžumân ij vaaigut tot, ete mon staatâst tun aasah.
Vuolgâttum pargeeh
Vuolgâttum pargeeh láá ulmuuh, kiäid syemmilâš pargoadeleijee lii vuolgâttâm paargon olgoenâmáid.
Pargokoččom eres ko EU-staatân, Eta-staatân, Sveitsin tâi sosiaaltorvosopâmušstaatáid
Jis tuu pargoadeleijee vuolgât tuu paargon vuálá 6 mánuppajan, te tust lii ain vuoigâdvuotâ Kela torjuid.
Jis tuu pargoadeleijee vuolgât tuu paargon paijeel 6 mánuppajan, almoot oovtâst tuu pargoadeleijein olgoeennâm pargoost Kelan. Almottâs ferttee toohâđ majemustáá, ko tun lah puátimin maasâd Suomân.
Pargokoččom EU-staatân, Eta-staatân tâi Sveitsin
Jis tuu pargoadeleijee vuolgât tuu paargon taid riijkáid, te tust lii táválávt vuoigâdvuotâ Kela torjuid.
Tuu pargoadeleijee kalga uuccâđ tunjin Iäláttâhtorvokuávdáást tuođâštus, main tun čááitáh nube staatâst, ete tun kuulah ain Suomâ sosiaaltoorvon.
Lasetiäđuid tuođâštus ucâmist tun uážuh Iäláttâhtorvokuávdáá siijđoin (etk.fi, suomâkielân).
Pargokoččom staatân, moin Suomâst lii sosiaaltorvosopâmuš
Jis tuu pargoadeleijee vuolgât tuu paargon sosiaaltorvosopâmušstaatân, te tust lii táválávt vuoigâdvuotâ Kela torjuid. Pargokoččom puáhtá talle pišteđ paijeel 6 mánuppaje.
Tággáár tilálâšvuođáin tuu pargoadeleijee kalga uuccâđ tunjin Iäláttâhtorvokuávdáást tuođâštus. Ton vuáđuld Kela totká, ete puáhtá-uv tunjin ain mäksiđ torjuid.