Puárásijiäláttâh

Puárásijiäláttâh puáhtá leđe pargoiäláttâh, aalmugiäláttâh teikâ kuohtuuh. Almoogiäláttâhhân máksoo puárásijiäláttâh álgá 65 ive avveest.

Ovdamerkkâ iäláttuvâin

Irján já Iŋgá lává naaijâm. Suái lává kuohtuuh puárásijiäláttuvâst.

Irján uážžu pargoiäláttuv 1 300 e/mp. Sun ij uážu aalmugiäláttuv ijge táhádâsiäláttuv.

Iŋgá lii tipšom kuhháá párnáid pääihist. Sun uážžu pargoiäláttuv 500 e/mp já aalmugiäláttuv suulân 370 e/mp. Te Iŋgá uážžu iäláttuv ohtsis suulân 870 e/mp. Sunjin ij kuulâ táhádâsiäláttâh.

Luuvâ lase pargoiäláttuv ucâmist (suomâkielân).

Iäláttuv toledem

Jis tust lii vuoigâdvuotâ aalmugiäláttâhân, te tun puávtáh meridiđ, ete vááldáh-uv tom toledum puárásijiäláttâhhân ovdil ko tun tiävdáh 65 ihheed. Toledum puárásijiäláttuv uážžu, jis lii tiävdám 63 ihheed.

Toledum iäláttâh lii pisovávt ucceeb ko aalmugiäláttâh, mii álgá 65-ihásâžžân. Iäláttâh kiäppán 0,4 % jyehi mánuppaajeest, moin tun toledah tom. Kannat väldiđ muuneeld čielgâsin, ete mon stuárusâš toledum puárásijiäláttâh ličij.

Ovdamerkkâ toledum puárásijiäláttuvâst

Piäkká páácá pargoiäláttâhân 63 ive já 9 mánuppaje avveest. Sun uážžu pargoiäláttuv 700 e/mp. Sun ocá toos lasseen aalmugiäláttuv toledum 1 ivvijn já 3 mánuppoojijn. Aalmugiäláttâh lii 6 % (suulân 20 e/mp) ucceeb ko tot ličij 65-ihásâžžân. Piäkká áásá ohtuu. Sun uážžu pargoiäláttuv lasseen aalmugiäláttuv suulân 320 e/mp.

Iäláttuv maŋedem

Tun jieh taarbâš uuccâđ iäláttuv vala 65-ihásâžžân. Te tun puávtáh maŋediđ iäláttuv älgim. Tot aaleed iäláttuv. Iäláttâh stuáru 0,6 % jyehi mánuppaajeest, moin tun maŋedeh tom.

Pargottesvuotâ já iäláttâh

Jis tun lah kuhháá pargottem já šoddâm ovdil ive 1958, te tust puáhtá leđe vuoigâdvuotâ uuccâđ 62-ihásâžžân puárásijiäláttuv. Taan tábáhtusâst iäláttâh ij kiäppán. Mudoi tun uážuh pargottespeiviruuđâ 65-ihásâžžân räi.