Puoccâmpeiviruttâ, vajoidittem
vâi iäláttâh?
Jis puácuvuotâ pištá kuhháá, te kalga smiettâđ, ete maht puátteevuođâst tahhoo.
Ko tun lah uážžum puoccâmpeiviruuđâ 60 argâpeivid, te Kela seelvât, ete puávtáččij-uv vajoidittem išediđ tuu puácuvuođâ. Jis tun lah uážžum puoccâmpeiviruuđâ 150 argâpeivid ađai masa 6 mánuppaje, te tun uážuh Kelast reeivâ, mast muštâleh vajoiditmist.
Jis tuu mielâst oro, ete tun tarbâšah vajoidittem, te tun puávtáh meid jieš väldiđ ohtâvuođâ tuu tipšoo tuáhtárân, pargotiervâsvuođâtuáhtárân tâi Kelan.
Pargonavcâttesvuotâiäláttâh
Puoccâmpeiviruttâ máksoo táválávt enâmustáá 300 argâpeivid. Jis tuu puácuvuođâst tâi váádust šaddee pargonavcâttesvuotâ juátkoo jiehke tun pyevti uážžuđ puoccâmpeiviruuđâ, te tun puávtáh uuccâđ argonavcâttesvuotâiäláttuv. Tom puáhtá mäksiđ pargoiäláttâhlájádâs, Kela tâi kuohtuuh.
Kela máksá pargonavcâttesvuotâiäláttuv, jis tun jieh lah lamaš pargoelimist tâi jis tun jieh uážu tuárvi iäláttuv pargoiäláttâhlájádâsâst.
Pargonavcâttesvuotâiäláttuv uážžumân vaaikut
- maggaar puácuvuotâ tâi váddu tust lii
- mon puáris tun lah
- maid pargoid tun lah porgâm
- maggaar škovliittâs tust lii.
Jis tun jieh paste maccâđ paargon jiehke uážu iäláttuv, te almottât pargo- já iäláttâstoimâttâhân ađai PI-toimâttâhân pargottes pargo-occen. Almottât majemustáá čuávuváá peeivi puoccâmpeiviruuđâ nuhâmist. Návt tun puávtáh uážžuđ pargottesääigi peiviruuđâ, ko tun vuárdáh miärádâs tuu pargonavcâttesvuotâiäláttuvâst.
Jis tun lah pargotteskasa jeessân, te uusâ tiänáspeiviruuđâ tuu jieijâd pargotteskassaast.