Sajanmáávsuh maađhijn
Kela sajanmáksá almos tâi priivaat tiervâsvuođâhuolâttâsân rahtum määđhi koloid, jis tun moonah tiipšon puácuvuođâ, äpittesvuođâ tâi šoddâdem keežild. Vajoiditmân rahtum maađhijd Kela sajanmáksá, jis vajoidittem vuáđuduvá Kela tâi almos tiervâsvuođâhuolâttâs adelem vajoidittemmiärádâsân. Määđhih sajanmáksojeh táválávt aldemuu tipšosajan já hälbimus mađhâšemvyevi mield.
Jis fáárust kalga leđe läiđejeijee tâi perruujeessân, te tun puávtáh uuccâđ sajanmáávsu meid sii mätkikoloin.
Kela ij sajanmäävsi talkkâsij sierâ viežžâmmääđhi apteekân.
Sajanmáksu ijâstâlmist
Jis tun koolgah ovdâmerkkân jotolâhohtâvuođâi tiet ijâstâllâđ tipšomsaajeest, te tun puávtáh uážžuđ ijâstâllâmruuđâ. Tot lii enâmustáá 20,18 eurod pirrâmpeeivist.
Maađhij jiešvástádâs
Jiešvástádâs lii 25 eurod määđhist oovtâ suundán. Kela sajanmáksá tunjin jiešvástádâs paijeel moonnâm koloid.
Uusâ sajanmáávsu kuittâg meid vuálá 25 eurod máksám maađhijn, maid tun lah máksám ollásávt jieš. Meid toh rekinistojeh fáárun ihejiešvástádâsân ađai mätkikáátun. Jis tun lah máksám kalenderive ääigi mätkikoloid 300 eurod, te Kela sajanmáksá loppâive ääigi mätkikoloid ollásávt.
Taksimääđhih
Jis tuu tiervâsvuođâtile tâi vááijuvliih jotolâhtileh väätih taaksi kevttim, te tun puávtáh uážžuđ tast sajanmáávsu. Tust kalga leđe tipšolájádâs adelem tuođâštus taaksi tarbâšlâšvuođâst (Todistus matkakorvausta varten SV 67).
Tiiláá taksi kuávlulii tiilámnumerist. Návt tun uážuh mätkisajanmáávsu tállân taaksist. Jiešvástádâs lii 25 eurod määđhist oovtâ suundán. Meid vuálá 25 euro pááccám määđhih rekinistojeh njuolgist ihejiešvástádâsân.
Luuvâ lase taksimaađhijn (suomâkielân).
Tun kaavnah kuávlulijd tiilámnumerijd Kela siijdoin (suomâkielân).
Tun puávtáh čuávvuđ tunjin ive ääigi šoddâm mätkikoloid Kela ášástâllâmpalvâlusâst (suomâkielân).