Sajanmáávsuh priivaat pyecceetipšoost já pänitipšoost

Kela sajanmáksá uási meid priivaat tuáhtár meridem tutkâmušâin já tipšoin. Tágáreh láá ovdâmerkkân fysioterapia já laboratoriotutkâmušah.

Kela ij määvsi sajanmáávsu, jis tun uusah priivaat tuáhtárist tuáhtárciälkkámuš ovdâmerkkân vyeijimkoortâ, iäláttuv tâi oppâlájádâsân uuccâm várás. Tuáhtárciälkkámušâi sajanmäksim kannat selvâttiđ Kelast.

Koijađ lase palvâlemnumerist 020 692 204 (suomâkielân).

Kela naanood tuáhtárpalhâšuumijd, tutkâmuššáid já tipšoid sajanmáávsuid. Tun uáináh taid Kela siijdoin (suomâkielân).

Kela ij sajanmäävsi toimâttahkoloid.

Tun uážuh sajanmáávsu távjá jo vuástáväldimist, ko čááitáh tuu Kela-koortâ. Tun puávtáh uuccâđ sajanmáávsu meid maajeeldkietân Kelast, jis tun lah máksám oles hade.

Jis tun ucâluuh tiipšon nube EU-enâmân, Eta-enâmân tâi Sveitsin, te tun uážuh tipšoost siämmáá sajanmáávsu, mon tun uážuččih västideijee tipšoost Suomâst.

Luuvâ lase tiervâsvuotâpalvâlusâi kevttimist olgoenâmijn (EU-terveydenhoito.fi, suomâkielân já tavekielân).

Mii tuáhtárist elimist sajanmáksoo?

Hendâ eelij priivaat spesiaaltuáhtárist já maavsij 20 miinut vuástáväldimist 80 eurod. Kela nanodem sajanmáksu lii 13,50 eurod. Kela sajanmáksá 13,50 eurod já Hendâ máksá jieš loopâid ađai 66,50 eurod (80 e–13,50 e = 66,50 e).

Sajanmáávsuh priivaat  pänitipšoost

Kela máksá sajanmáávsu meid njäälmi já paanij tipšoost priivaat pänituáhtárist. Puávtáh uážžuđ sajanmáávsu pänituáhtár rähtim njäälmi já paanij tutkâmušâst jyehi nube ivveest. Kela máksá sajanmáávsu meid priivaat pänituáhtár meridem tutkâmušâin já tipšoin.

Sajanmáksu máksoo meid priivaat tuáhtár meridem njälmihygienist palhâšuumijn.

Kela ij táválávt sajanmäävsi päniproteesáid lohtâseijee koloid.

Luuvâ lase pänitipšo sajanmáávsuin (suomâkielân).