Sämikielâlij fastâtaksivuoigâdvuotâ

Kela sajanmáksá almos tâi priivaat tiervâsvuođâhuolâttâsân rahtum määđhi koloid, jis tun moonah tiipšon puácuvuođâ, äpittesvuođâ tâi šoddâdem keežild. Määđhih sajanmáksojeh táválávt aldemuu tipšosajan já hälbimus mađhâšemvyevi mield. Jis tuu tiervâsvuođâtile tâi vááijuvliih jotolâhtileh väätih taaksi kevttim, te tun puávtáh uážžuđ tast sajanmáávsu. Puávtáh pivdeđ tipšolájádâsast tuođâštus taaksi tarbâšlâšvuođâst (Todistus matkakorvausta varten SV 67).

Kela miärádâs mield sämikuávlust ässee sämikielâláid sämmiláid mieđettuvvoo fastâtaksiäššigâsvuotâ Kela sajanmäksim taksimaađhij várás. Miärádâs vuáđuduvá säämi kielâlaahân, ijge sämikielâlâš äššigâs taarbâš tom uuccâđ sierâ.

Návt tun tiilááh Kela taksimääđhi

  1. Valjii olssâd njuolgâsajanmáksuvuáhádâhân servâm sämikielâlii vyeijee, kiäst tun tiilááh Kela sajanmäksim taksimaađhijd.
    • Tiiláá taksi njuolgist jieijâd fastâtaaksist majemustáá määđhi tađe oovdeb peeivi tme 14 räi.
    • Tun puávtáh tiiláđ siämmáá tove puoh tuu tiäđust orroo moonnâm- já maccâmsáátuid.
    • Taksi almoot tuu taksimääđhi tiäđuid tiilámkuávdážân.
  2. Almoot jieijâd fastâtaaksin suáitu ohtâvuođâst
    • jieijâd nommâ já persovntubdâldâh
    • čujottâs, kost auto viäžžá tuu
    • määđhi čuosâttâh (om. pyecceeviäsu)
    • tijmeäigi, kuás tun koolgah leđe tipšo-ohtâduvvâst
    • puátih-uv tuu fáárun išeniävuh teikâ läiđejeijee
    • puhelinnummeer, mast tuu juksá.
  3. Jis tuu kevttim fastâtaksi ij lah tääl finniimist
    • teikâ jis tuu aassâmkuávlust ij lah sämikielâlâš taksivyeijee mieldi njuolgâsajanmáksuvuáháduvvâst, te vääldi ohtâvuođâ tiilámkuávdážân 0800 302 240 (Menevä Oy).
    • Tij pyehtivetteđ oovtâst tiilámkuávdáin selvâttiđ, ete puáhtá-uv tiilámkuávdáš čujottiđ tunjin tiätu sämikielâlii fastâtaksivyeijee.
  4. Čääiti vyeijei jieijâd Kela-koortâ.
    • Ko tun čááitáh vyeijei jieijâd Kela-koortâ, te tun finniih mätkisajanmáávsu tállân taaksist já tun máávsáh määđhist enâmustáá 25 euro jiešvástádâs.
    • Huámmáš, ete tuu tiilám taksimääđhist pyehtih leđe mieldi meid eres äššigâsah.
  5. Pivde tuođâštus mätkisajanmáávsu várás.
    • Jis tun tarbâšah taaksi tuu tiervâsvuotâtile tiet, te pivde tast tuođâštus tiervâsvuotâhuolâttâsâst (Todistus matkakorvausta varten SV 67).
    • Siäilut oovtâ määđhi várás čallum tuođâštus alnestâd 6 mánuppaje ääigi mätkipeeivi rääjist. Kela puáhtá pivdeđ tom maŋeláá.
    • Tooimât Kelan tuođâštus, mii addel kuhesáigásii vuoigâdvuođâ taaksi kiävtun.
    • Jis tipšolájádâs pargee lii tiilám tunjin taaksi päikkimääđhi várás, te tun jieh taarbâš sierâ tuođâštus taaksi kiävtu taarbâšlâšvuođâst.

Luuvâ lase