Talhâssajanmáávsuh
Kela puáhtá mäksiđ sajanmáávsu reeseepttalkkâsijn, maid tuáhtár tâi pyecceitipšoo lii meridâm tuu puácuvuođâ tiipšon. Sajanmáksu máksoo ton maŋa, ko algâjiešvástádâs lii olášum. Algâjiešvástádâs lii 50 eurod ivveest.
Kela ij määvsi sajanmáávsu puoh talkkâsijn.
Tun kaavnah Kela siijdoin tiädu sajanmäksimnáál talkkâsijn (suomâkielân).
Apteekijn já Kelast lii meid ääigitásásâš tiätu algâjiešvástádâs meereest, mon tun lah máksám. Ko algâjiešvástádâs lii olášum, te apteek keeppid talkkâs haddeest Kela mäksim sajanmáávsu. Loppâuási haddeest tun máávsáh jieš.
Čujoshadde já talkkâs lonottem hälbibân
Uási talkkâsijn kulá čujoshaddevuáhádâhân. Tááid talkkâsáid lii meridum čujoshaddejuávkku já čujoshadde. Talkkâs vyebdimhadde puáhtá leđe stuárráb ko čujoshadde. Kela kuittâg máksá sajanmáávsu čujoshade mield.
Siämmáá čujoshaddejuávhust láá talkkâseh, moh láá koskânis lonottemtoháliih.
Tun puávtáh lonottiđ reseptân merkkejum talkkâs apteekist västideijee, mutâ häälbib talkkâsân. Apteek ij uážu lonottiđ talkkâs, jis talkkâs merideijee kiäldá lonottem.
Jis talkkâsist ij lah čujoshadde, te tun finniih sajanmáávsu vyebdimhade mield.
Sierânâssajanmáksu
Motomijn talkkâsijn tun puávtáh uážžuđ sierânâssajanmáávsu, mii lii stuárráb ko vuáđusajanmáksu. Tom uážžu tiätu vaigâdvuođâi já kuhesáigásij puácuvuođâi tiipšon meridum talkkâsijn. Vuoigâdvuođâ sierânâssajanmááksun kalga uuccâđ Kelast. Tun tarbâšah tađe várás tuáhtár čäällim B-ciälkkámuš.
Talhâssajanmáávsu puáhtá uážžuđ meid motomijn raavâdvalmâštuvâin. Sajanmáávsu raavâdvalmâštuvâin uážžu ovdâmerkkân mielkkiallergia tâi njommâsemhemâdâs pyeccee. Vuoigâdvuođâ sajanmááksun raavâdvalmâštuvâin uážžu Kelast. Tun tarbâšah tađe várás tuáhtár čäällim B-ciälkkámuš.
Stuorrâ talhâskoloh
Jis tun koolgah uástiđ ennuv talkkâsijd, te tun puávtáh uážžuđ lasesajanmáávsu talhâskoloid. Talhâskoloi jiešvástádâs lii 579,78 eurod. Ko tuu sajanmaksum talkkâsijn mäksim talhâskoloh maneh taan sume paijeel, tun uážuh njuolgist apteekist lasesajanmáávsu tuu talkkâsijn ive loopâ räi.
Lasesajanmáksu uáivild tom, ete tun máávsáh talkkâsist tuše 2,50 euro, veikâ tot ličij tivrâsub. Tun puávtáh uuccâđ lasesajanmáávsu Kelast meid maajeeldkietân.
Tun puávtáh čuávvuđ tunjin ive ääigi šoddâm taalhâskoloid Kela ášástâllâmpalvâlusâst (suomâkielân).
Talkkâs uástim olgoenâmijn
Jis tun ááiguh uástiđ talkkâs nube EU-enâmist, Eta-enâmist tâi Sveitsist, te tun puávtáh pivdeđ tuáhtárist sierâ talhâsmiärádâs, mooin puáhtá uástiđ talkkâs olgoenâmijn.
Tun puávtáh uuccâđ sajanmáávsu olgoenâmijn ostum talkkâsist maajeeldkietân Kelast.
Sajanmáávsu uážžum váátá, ete taalhâs lii tuhhiittum sajanmäksimnáál Suomâst.