Pargottesvuotâpeiviruttâ
Pargottesvuotâpeiviruttâ puáhtá leđe tiänáspeiviruttâ tâi vuáđupeiviruttâ.
Tiänáspeiviruttâ
Tiänáspeiviruuđâ stuárudâh rekinistoo tiänásij mield. Puávtáh uážžuđ tiänáspeiviruuđâ, jis kuulah pargottesvuotâkaasan. Ovdâmerkkân sierâ áámmátsuorgijn láá távjá jieijâs pargottesvuotâkasah. Láá meiddei pargottesvuotâkasah, moid puáhtá kuullâđ kii peri.
Kela ij määvsi tiänáspeiviruuđâ, já tom jieh uusâ Kelast.
Tiänáspeiviruuđâ puáhtá mäksiđ, jis tun lah lamaš tuárvi kuhháá pargottesvuotâkasa jeessân já tust olášuvá pargoost orroom iähtu. Pargoost orroom iähtu olášume meerhâš tom, ete tun lah lamaš tuárvi kuhháá pargoost ovdil pargotteemmin pääccim.
Tiänáspeiviruttâ máksoo enâmustáá 400 peivid. Jis tun lah lamaš pargoost vuálá 3 ive, te tun puávtáh uážžuđ tiänáspeiviruuđâ enâmustáá 300 peivid.
Koijâd lasetiäđuid tiänáspeiviruuđâst tuu jieijâd pargottesvuotâkassaast tâi Pargottesvuotâkasai ohtsâšseervist (tyj.fi, suomâkielân).
Vuáđupeiviruttâ
JJis tun jieh lah pargottesvuotâkasa jeessân jiehke uážu tiänáspeiviruuđâ, te Kela máksá vuáđupeiviruuđâ. Tot máksoo enâmustáá 400 peivid. Jis tun lah lamaš pargoost vuálá 3 ive, vuáđupeiviruttâ máksoo enâmustáá 300 peivid.
Vuáđupeiviruuđâ finniimân láá raijiittâsah, jis tun lah vuálá 25-ihásâš. Täärhist PI-toimâttuvâst, ete puávtáh-uv uážžuđ vuáđupeiviruuđâ.
Luuvâ lase vuáđupeiviruuđâ ucâmist (suomâkielân).
Mon ennuv vuáđupeiviruuđâ uážžu?
Vuáđupeiviruttâ lii 33,78 eurod peeivist, já tot máksoo 5 peeivist ohhoost. Jis tust láá päärnih, tun uážuh pärnialedem. Tot lii 5,30–10,03 eurod peeivist tađe mield, kalle päärni tust láá.
Tun máávsáh vuáđupeiviruuđâst viäruid.
Vuáđupeiviruutân puáhtá mäksiđ aledemuási, jis tun uásálistáh PI-toimâttuvváin soppum tooimân. Vuáđupeiviruuđâ aledemuási lii 4,80 eurod peeivist. Vuáđupeiviruutân máksoo enâmustáá 200 peeivist.
Tun puávtáh rekinistiđ Kela viermisiijđoin, mon ennuv vuáđupeiviruuđâ tun uážuh (suomâkielân).
Pargotteemmin olgoenâmijn
Pargottesvuotâpeiviruttâ máksoo motomijn tábáhtusâin meid talle, ko tun lah olgoenâmijn já uusah tobbeen pargo.
Pargoost orroom iähtu
Vâi tun uážuh vuáđupeiviruuđâ, te tust kalga olášuđ pargoost orroom iähtu.
Pargoost orroom iähtu olášuvá, jis
- tun lah lamaš pargoost ucemustáá 26 okkod majemui 28 mánuppaje ääigi
- tuu pargoäigi lii lamaš ucemustáá 18 tijmed ohhoost
- tuu pälkki lii lamaš syergi pargoiähtusopâmuš miäldásâš tâi ucemustáá 1 252 eurod mánuppaajeest.
Meid porgâm monnii eres EU- tâi Eta-riijkâst tâi Sveitsist puáhtá rekinistiđ mieldi.
Pargoost orroom iähtun pyehtih rekinistiđ fáárun pargo meid kuhheeb ääigist ko 28 mánuppaajeest, jis:
- tun lah puáccám
- tun lah jottáám uápuid
- tun lah tipšom vuálá 3-ihásii párnád
- tun lah uásálistám PI-toimâttuv ornim tooimân.
Irâtteijest lii jieijâs pargoost orroom iähtu. Jis tun lah irâtteijee, te täärhist vuáđupeiviruuđâ iävtuid Kelast. Tun puávtáh koijâdiđ lase palvâlemnumerist 020 692 210.