Uuccâm já mäksim
Tun puávtáh uuccâđ iänááš torjuid Kela ášástâllâmpalvâlusâst. Täärhist ucâmušâst, ete moh lahtosijd tast kalgeh leđe. Meid lahtosijd puáhtá toimâttiđ Kelan ášástâllâmpalvâlusâst viermist.
Tun puávtáh uuccâđ torjuid meid luámáttuvâiguin, maid uážžu Kela siijđoin. Tun uážuh luámáttuvâid meid Kela toimâttuvâst. Jis tun uusah torjuu luámáttuvváin, te vuolgât tom Kelan. Kela čujottâs lii
Kela
PL 10
00056 KELA
Puávtáh tipšođ masa puoh Kela-ašijdâd meiddei puhelin peht.
Jis tun lah ucâmin áigápuátutorjuu, te keejâ ton tärhibijd uuccâmravvuid Kela siijđoin.
Uuccâm njálmálávt
Jis tun jieh pyevti uuccâđ vuáđuáigápuátutorjuu viermist tâi pävirluámáttuvváin, te tun puávtáh uuccâđ tom meid njálmálávt. Suáiti talle Kelan tâi moonâ Kela toimâttâhân.
Miärádâs torjuu mäksimist
Ko Kela lii kieđâvuššâm tuu ucâmuš, te tun uážuh pááikán reivân miärádâs tast, ete uážuh-uv torjuu. Miärádâsâst muštâluvvojeh torjuu meeri, vuáđustâsah já máksupeivi. Tun uážuh miärádâs meid talle, jis tunjin ij lah mieđettum toorjâ.
Ko tun uusah torjuu sämikielâlii luámáttuvváin, te tun uážuh automaatlávt miärádâs sämikielân.
Kela máksá torjuu tuu paŋkkitilin.
Tun puávtáh keččâđ torjui máksupeeivijd meid Kela siijđoin (suomâkielân).
Almoot, jis tuu tiileest šaddeh nubástusah
Jis tuu eellim muttoo, tot puáhtá vaiguttiđ Kela torjuid. Muttum puáhtá kuoskâđ ovdâmerkkân asâmân, puáđoid, porgâmân tâi perrui.
Mušte almottiđ nubástusâin Kelan. Puávtáh toohâđ tom viermist, puhelimist tâi toimâttuvâst.
Tuu ovdâsvástádâs lii visásmittiđ jieijâd peeleest, ete Kelast láá olmâ tiäđuh kevttimnáál. Talle toorjâ máksoo tunjin olmâ stuárusâžžân.
Maasâdpeerrâm
Jis Kela máksá torjuu liijkás ennuv puástutiäđui tiet, te tom kalga peerrâđ tust maasâđ.
Jis miärádâsâst lii feilâ
Jis Kela miärádâsâst lii tuu mielâst feilâ, tun puávtáh uuccâđ nubástus miärádâsân. Tun uážuh miärádâsreeivâ mield ravvuid tast, ete maht nubástus occoo.
Jis tust láá koččâmušah, te vääldi vistig ohtâvuođâ Kelain.