Stivrâ tuhhiittij oovdânpyehtim piäláduvváid, moh uásálisteh ovdâskoddevaljáid, ovdâskoddevaaljâi teeman sämmilij uáivilist. Sämitigge taha maŋeláá tärhibijd oovdânpyehtimijd haldâttâsohjelm sämmiláid kyeskee ulmen já puáhtá tuávváštiäđu haldâttâsráđádâlleid. ”Stivrâ toovâi oovdânpyehtim váhá uđđâ vuovijn. Halijdijm pyehtiđ piäláduvváid tiäđu sämmilijn positiivlii čuovâst. Sämmiliih láá Suomân riggodâh, iä čuolmâ. Mist láá sämipárnááh já nuorah kiäh halijdeh oppâđ jieijâs kielâ já iäláttâsâid já staatâ kalga adeliđ sijjân toos máhđulâšvuođâ.” sämitige saavâjođetteijee Klemetti Näkkäläjärvi muštâlij. 

Sämitige toohâm oovdânpyehtimist vuájuh sämmilij vuoigâdvuođâi, sämitige pargoi, sämmilij kielâlij já iäláttâsân kyeskee vuoigâdvuođâi sehe máttááttâs, sosiaal- já tiervâsvuođâpalvâlusâi já säminuorâi tááhust tehálijd aššijd. Sämitigge tuáivui, ete ovdâskoddevaaljâin ličij vuáđu- já olmoošvuoigâdvuođâi peeleest mietimielâlâš pirrâdâh. ”Amal eres-uv tergâdis ääših láá, mutâ halijdijm vuáijuđ muádi äigikyevdilis teeman. Tuáivum, ete piäláduvah já ovdâskoddevaaljâiävtukkâsah uápásmuveh mii iävtuttâssáid já tuárjuh taid. Sämitigge lii meid ain vaalmâš adeliđ lase tiäđu”, saavâjođetteijee Näkkäläjärvi tiädut.

Sämitige stivrâ tuhhiittij ciälkkámuš Yleisradio muštâlusâst ivveest 2014. Sämitigge tiäduttij, ete Yle Säämi sämikielâlâš uđâspyevtittem lii puáránâm jieijâs tooimâ oovdedmáin. Sämikielâlâš nuorâiohjelm Sukkâršokki lii áinoo sämikielâlâš nuorâiohjelm já viehâ tergâd. Sämitigge váátá Yle Sáámán eenâb jiečânâs sajattuv.  Sämitigge miäruštâlâi, ete muštâlusive ääigi lii tábáhtum sämmilij tááhust viehâ tergâdis aalmuglijd já aalmugijkoskâsijd haavâid já uđđâsijd, main Yle Säämi uđâstieđettem lii luhostum lyevdimnáál, jotelávt já lyetittetteht. Puáđusdâslâš toimâ kolgâččij oinuđ Yle Säämi ruttâdmist táálást pyerebeht já väldiđ vuotân tom, ete Yle Säämi ij palvâl tuše sämmilijd peic ubâ syemmilii ohtsâškode. Ubâ syemmilâš ohtsâškodde, merideijeeh já virgeomâhááh tarbâšeh tiäđu sämmilijn já algâaalmugij vuoigâdvuođâin. Yle Säämi ruttâdem kalgeh tarkkuđ návt vijđásubbooht ubâ Yle ohtsâškodálij kenigâsvuođâi háárán.

Sämitigge kiddij huámmášume toos, ete sämikielâliih párnáiohjelmeh láá uccáá já ete ij lah sämikielâlâš nuorâi tv-ohjelm. Yle Säämi uđâspyevtittem kolgâččij pyevtittiđ vijđásubbooht ubâ sämikuávlust, anarâš- já nuorttâlâškielâlii ohjelmpyevtittem lasettiđ já ohjelmääigi nuuvt televisiost ko radiost-uv lasettiđ. Sämitigge lii huolâstum Yle toimâtiilij tiileest já Yle Säämi jienâvuárkkáarkkâduvvâst, mon iä lah valagin pieijâm digiháámán. Sämitigge váátá Yleisradio tarvâniđ taid vänivuođáid. 

Sämitige stivrâ oovdânpuovtij almosčuákkimân ete tot tuhhit sämitige muštâlus ivveest 2014 sehe čielgiittâs oppâmateriaalmeriruuđâ kiävtust já sosiaal- já tiervâsvuođâpalvâlusmeriruuđâ kiävtust ive 2014. Stivrâ nomâttij ovdâsteijen pyecceetipšon kampuskuávlu ulguubeln – haavâ stivrimjuávkun Pia Ruotsala.  Haahâ lii Laapi áámmátollâškoovlâ, Kittâl, Aanaar, Suáđigil já Kiemâjäävri kieldâi sehe Laapi pyecceetipšopirrâduv vuáđutiervâsvuođâhuolâttâs ohtâduv haahâ. Ton ulmen lii lääččiđ toimâmaali, mii taha máhđulâžžân škuávlejum tiervâsvuođâtipšon kampuskuávlu ulguubeln.

Stivrâ kieđâvušâi eres aašijn Tiänu sopâmuš tile já meridij asâttiđ ráđádâllâmpargojuávhu, moos kuleh Klemetti Näkkäläjärvi, Nilla Tapiola, Ilmari Tapiola já Asko Länsman ráđádâllâđ Taažâ sämitiggijn Tiänu kuálástemsopâmušâst. Ráđádâlmij maŋa sämitige stiivrâ vuáđudem sierâ Tiänu-pargojuávkku, moos kuleh puoh sämitige Ucjuv jesâneh, juátká ääši kieđâvuššâm. 

Stivrâ kieđâvušâi Saijoos kevttim- já láiguiävtuid já meridij ráđádâllâđ ääšist Senaatti-kiddoduvváin, mii oomâst táálu. 

Stivrâ nomâttij nuorâirääđi oovdânpyehtim mield säämi parlamentaarlii rääđi nuorâipoolitlii ohjelm valmâštellee pargojuávkun eidusii jesânin Elli-Marja Hetta já värijesânin Nilla Rahko. Ohjelm valmâštâlmist västid Suomâ sämitigge. Ohjelm lii tárguttâs valmâštuđ taan ive. 

Čuávuvâš stiivrâ čuákkim tuálloo almosčuákkim maŋa 24.2.2015.