| Sämitigge tieđeet sämitiggelaavâst |
|
|
|
Ovdâskode vuáđulahâváljukodde lii pivdám sämitiggeest 4.3.2015 ciälkkámuš haldâttâs oovdânpyehtimist sämitiggelaahân (HE 167/2014) vp váljukode čuákkimân, mii álgá 5.3.2015 tijme 8.30.
Sämitigge lii adelâm kirjálii ciälkkámuš. Sämitigge almostit päikkisijđoinis puoh ciälkkámušâid, maid lii adelâm váljukoodán, ko vuáđulahâváljukodde lii finnim pargos loopân. Sämitigge addel vuáđulahâváljukoodán pargoráávhu.
Sämitige 5.3. adelem ciälkkámuš vuáđuduvá sämitige čuákkim tuhhiittem miärádâssáid čuákkimijn 4/2013 já 2/2014 sehe sämitige čuákkimij tuhhiittem eres ciälkkámuššáid já vaaljâpaje toimâohjelmân. Haldâttâs oovdânpyehtimist lii sämitige adelem tiätun vuáđuduvvee munemietâmâš. Vuáđulahâváljukode suogârdem nubástusâin sämitiggelaahân ij lah sämmilij tiätun vuáđuduvvee munemietâmâš.
Sämitige uáivil lii, ete sämitige valjáid kyeskee njuolgâdusâid kalga heiviittiđ taan ive sämitiggevaaljâin. Sämitiigán tehálumos haldâttâs oovdânpyehtimist lii sämmilâšmiäruštâllâm sehe oovtâsttoimâmkenigâsvuotâ já sämmilij algâaalmugsajattuv turvim já ovdedem já tot váátá tai tuhhiittem haldâttâs oovdânpyehtim miäldásávt.
Haldâttâs oovdânpyehtim kalga tuhhiittiđ äššisiskáldâs peeleest tagarin sehe jieš lahâteevstâ ete tai sierânâsvuáđustâsâi uásild. Sämitige iävtuttem uáivil lii tot, ete sämitiggelaavâst kalga leđe sämmilij tiätun vuáđuduvvee munemietâmâš.
Sämitigge kunnijât staatârađđijn finnejum ohtsâšibárdâs sämitiggelaahân já váátá taam ohtsâšibárdâs kunnijâttem meid ovdâskoddeest.
Sämitigge taha puoh maid máhđulâš, vâi sämitiggelaavâ puáhtá tuhhiittiđ taan ovdâskodepaajeest sämmilij tiätun vuáđuduvvee munemietâmâššáin. Sämitigge ij tuhhit sämmilij algâaalmugsajattuv hiäjusmitmijd ige luovâ prinsiipijnis ige árvuinis já tuáimá almosčuákkim adelem miärádâsâi miäldásávt sämitiggelaavâ ovdâskoddekieđâvuššâm ääigi.
Sämitigge 5.3.2015.
|
|
| Viimeksi päivitetty ( 07.03.2015 ) |